Kërkoi dorëheqjen nga shqyrtimi i ndryshimeve statutore të Berishës, gjykata e kthen mbrapsht

Gjyqtarit të Gjykatës së Tiranës, të cilit i ra shorti për të shqyrtuar Ndryshimet Statutore të Kuvendit Kombëtar të Partisë Demokratike më 11 dhjetor – i thirrur nga ish-lideri Sali Berisha – pas kërkesës së tij për t’u dorëhequr, nuk i është pranuar.

“Ju informoj lidhur me kërkesën e depozituar në gjykatë nga ana e PD-së me objekt ‘Depozitim ndryshimesh statutore dhe vendimmarrje të Kuvendit Kombëtar’ ju bëj me dije se pas hedhjes së shortit, gjyqtar i çështjes është caktuar Agron Zhukri dhe kërkesa ë tij për dorëheqje nuk është pranuar nga Zëvendëskryetari i Gjykatës”.

Komisioni i Rithemelimit të PD-së, i krijuar në Kuvendin e 11 dhjetorit, depozitoi në Gjykatën e Tiranës më 15 dhjetor, ndryshimet statutore që u miratuan atë ditë me qëllim për t’i legjitimuar.

Ndryshimet në statutin e PD-së

Pika më kryesore ishte ajo e krijimit të një Komisioni Tranzitor rithemelimi me 15 anëtarë dhe do të ushtronte të gjithë kompetencat që u takojnë organeve qendrore të PD-së, me përjashtim të atyre që i takojnë Kuvendit Kombëtar.

Ky komision përshkruhet gjithashtu si përgjegjës për organizimin dhe mbajtjen e proceseve zgjedhore brenda PD-së.

Krijimi i organeve të reja brenda të djathtëve, sipas nenit 65 të tij, fillon menjëherë dhe përfundon jo më vonë se tre muaj pas hyrjes në fuqi.

Pra, nëse ndryshimet statutore marrin fuqi, brenda marsit, demokratët mund të kenë një lidership të ri drejtues.

Kryetari zgjidhet sipas parimit “një anëtar një votë”.

Ndërsa, çdo akt i organeve të partisë, i ndërmarrë para hyrjes në fuqi të këtij statuti dhe që bie në kundërshtim me dispozitat e tij, shfuqizohet automatikisht me hyrjen në fuqi të statutit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.