Ish-kryetari i Komisionit të Rithemelimit, Belind Këlliçi ka paditur në Gjykatën e Tiranës aktivisten republikane Evi Kokalari.
Kjo, pas akuzave të rënda në drejtim të ish-kryetarit të Forumit Rinor të Partisë Demokratike.
Në shkresën e padisë, të cilën e disponon Albanian Post, Këlliçi kërkon dëmshpërblim lidhur me shpifjet dhe publikimet e mesazheve telefonike nga ana e Kokalarit.
Jo vetëm kaq, në kërkesë-padinë e ish-kryetarit të FRPD-së, cilësohet edhe statusi “akuzues” në median sociale Facebook i aktivistes republikane.
Kokalari sulmoi Këlliçin gjatë periudhës njëjavore të mbledhjeve të dy këshillave kombëtarë, për zgjedhjen e posteve drejtuese të partisë.
Përmes një statusi, ajo ngriti disa akuza shumë të forta kundrejt një prej zërave më pranë Berishës (Belind Këlliçit – AP).
Kjo, pasi e akuzonte këtë të fundit për orientim votash në zgjedhjen që u bënë për Kryesinë e re të demokratëve.
Sipas saj, të angazhuar kanë qenë edhe anëtarë nga forumi rinor – i drejtuar nga Këlliçi.
Ndaj, mbi këtë premisë, ajo argumenton se nuk është etike që të lobohej nga anëtarët e Këshillit Kombëtar të PD-së për miq në një garë si ajo për Kryesinë.
Reagimi
“Prej shumë ditësh, publikisht, jam sulmuar nga Zj. Evis Kokalari, me gjuhë më linçuese se ajo e kundërshtarëve tanë politikë. Janë hedhur drejt meje akuza të shumta nga më absurdet, të cilat qëndrojnë në gojën e Zj. Kokalari dhe në faqen e saj në rrjetin social Facebook”, shkruan deputeti demokrat në reagimin e tij.
Këlliçi thekson se ka zgjedhur heshtjen duke njohur së brendshmi situatën politike në Partinë Demokratike gjatë muajve të fundit.
Sipas tij, ky sulm nuk është i beftë.
Kjo, pasi gatitej që nga koha kur në Foltoret e nismëtuara nga Doktor Berisha, përpos Kokalarit, u pozicionuan të rinjtë e FRPD; mes tyre edhe unë, shton më tej ish kreu i kësaj strukture.
“Shi me baltë nuk ka! Ka shi që dheun e bën baltë, dhe Zj. Kokalari e ka bërë baltë ndaj personit tim dhe FRPD që unë drejtoj, duke e cilësuar ‘klan’ brenda PD”, vëren më tej ish-kryetari i Komisionit të Rithemelimit.
Këto akuza, nënvizon Këlliçi, nuk më japin aspak dhimbjen e dhunës së ushtruar ndaj nesh komisariateve të policisë e nuk janë gas lotsjellës që të lotoj prej tyre, mirëpo i kam përjetuar të gjitha me jo pak mërzi, por gjithnjë brenda pritshmërive politike.
“Kokalari ka barrën të faktojë në gjykatë çdo të thënë të saj kundrejt Belind Këlliçit dhe FRPD. Bujrum të vijë dhe të faktojë qoftë dhe një akuzë të vetme!”, përmbyll reagimin ish-kryetari i FRPD-së.
Ai tregon sakaq se paratë e dëmshpërblimit “do t’i shpenzojë kokërr më kokërr si donacion për të rinjtë e FRPD-së”.
Kjo, nëpërmjet një moduli trajnues dhe edukues për gjuhën e urrejtjes, fake news dhe linçimin publik.
Berisha
Kryetari i Partisë Demokratike, Sali Berisha i dha fund më herët përplasjeve në distancë mes Kokalarit dhe Këlliçit.
Duke iu përgjigjur gazetarëve, lideri demokrat theksoi se nuk është në favor të asnjë lobimi qoftë ai negativ apo pozitiv.
“Sa i takon zotit Këlliçi (Belind Këlliçi – AP) unë e konsideroj atë një bashkëpunëtor shumë të çmuar dhe një njeri që ka dhënë një kontribut në të gjithë ecurinë dhe përpjekjen e PD-së për rithemelimin”, deklaroi fillimisht Berisha.
Për aktivisten republikane, kreu i selisë blu sqaroi se ajo vendosi vetë të mos hyjë në garë.
“Evi Kokalari ka kontributin e saj por vendosi vetë të mos kandidojë dhe të tërhiqet në jetën dhe të ndjekë karrierën e saj – në Partinë Republikane”, ravijëzoi ish-kryeministri.
Ndërsa Këlliçi njihet për angazhimin e tij të gjerë dhe të mirënjohur në Forumin Rinor të Partisë Demokratike edhe si kryetar i kësaj strukture, nuk mund të thuhet e njëjta gjë për Kokalarin.
Kjo e fundit, nuk ka asnjë pozicion të përcaktuar brenda strukturave të Partisë Republikane në Shtetet e Bashkuara, por në selinë e PD-së u shfaq pikërisht pas përjashtimit të Berishës nga ish-lideri demokrat Lulzim Basha.
/Albanianpost.com
