KEDS inspekton pikat matëse të rrymës në Veri

Kompania Kosovare për Distribuim me Energji Elektrike në Kosovë, këtë të mërkurë, ka njoftuar se disa nga zyrtarët e kësaj kompanie me 3 janar kanë bërë inspektimin e pikave matëse të energjisë elektrike në pikat kufitare në Veri të Kosovës.

“Ky inspektim po realizohet nga drejtorët në KEDS:  Shukri Aliu – Departamenti i Humbjeve, Bujar Jupaj – Departamenti i Sistemit të Operimit, dhe Milazim Avdiu – Departamenti i Operimeve, i përcjellur nga ekipet e matjeve dhe mbrojtjes”, thuhet në njoftimin e KEDS-it.

Ndryshe Operatori i Sistemit, Transmisionit dhe Tregut i Kosovës (KOSTT) njoftoi ditë më parë se nga 1 janari i vitit 2024, në katër komunat në Veri të Kosovës ka nisur të regjistrohet energjia elektrike e shpenzuar.

Sipas kryeshefit të KOSTT-it, Evetar Zeqiri, energjia e konsumuar në pjesën veriore të Kosovës, të banuar me shumicë serbe, do të paguhet njësoj sikurse në pjesën tjetër të shtetit.

“Më 1 janar 2024, duke filluar nga 00:01, furnizuesi Elektrosever Sh.p.k, – kompani e licencuar dhe e regjistruar sipas ligjeve të Republikës së Kosovës – ka filluar të nominojë energjinë për katër komunat e Veriut. Pra ka filluar të marrë përgjegjësinë për konsumin e energjisë në Veri. Pas më shumë se 20 vjetësh, energjia e konsumuar në pjesën veriore do të paguhet njësoj sikurse në pjesën tjetër të territorit të vendit”, shkroi ai në Facebook.

Në fillim të dhjetorit të vitit 2023, Bashkimi Evropian njoftoi se kompania serbe, Elektrosever, kishte nënshkruar kontratë komerciale për energji me KEDS, sipas marrëveshjes për energji në mes të Kosovës dhe Serbisë.

Elektrosever është në pronësi të kompanisë energjetike të Serbisë, EPS (Elektroprivreda Srbije).

Kjo kompani mori licencën për operim nga Zyra e Rregullatorit për Energji e Kosovës (ZRRE) më 24 qershor të vitit 2023.

Ndërsa më 21 qershor, Kosova dhe Serbia e nënshkruan udhërrëfyesin për zbatimin e Marrëveshjes për Energji, që ishte arritur më 2013 në kuadër të dialogut të ndërmjetësuar nga Bashkimi Evropian.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.