Të martën e 21 dhjetorit Instituti Demokratik i Kosovës (KDI) ka mbajtur tryezën me temën “Fushata zgjedhore për zgjedhjet lokale 2021 dhe ndikim i saj në punën e Kuvendit të Kosovës”, ku me ç’rast Eugen Cakolli nga ky institut ka potencuar se element i rëndësishëm që dëshmon për pjekurinë e subjekteve politike dhe kandidatëve në garë, është pranimi i menjëhershëm i rezultatit zgjedhor.
“Në të gjitha komunat, të gjithë kryetarët e zgjedhur kanë pranuar mandatin e tyre pa ndonjë problem, ndërsa në rastet kur ka pasur ndërrim pushtetesh, tranzicioni ka qenë i qetë dhe ka shpërfaqur korrektësi politike mes kandidatëve”, ka thënë Cakolli.
Sipas tij rastet e acarimit të gjuhës dhe ashpërsimit të diskursit mes kandidatëve kanë qenë mjaft të shprehura, sidomos gjatë debateve televizive.
“Gjatë fushatës për raundin e parë është vërejtur një koncentrim dukshëm më i madh i aktiviteteve të fushatës në promovimin e kandidatëve për kryetarë komunash, duke lënë në hije kandidatët për kuvendet komunale”, ka shtuar ai.
Për Cakollin numri i përfshirjes së grave në listat zgjedhore ka qenë minimale.
“Përkundër thirrjeve të vazhdueshme për përfshirje të më shumë grave në lista zgjedhore, subjektet politike përgjithësisht kanë vijuar me respektimin e kriterit minimal ligjor prej 30 për qind, dhe atë vetëm në kuadër të listave për kuvendet komunale”, ka shtuar ai.
“Nga një mijë e dy kandidatët që kanë arritur të fitojnë ulëse në të gjitha kuvendet komunale në nivel vendi, vetëm 364 prej tyre ishin gra. Ky numër i grave është afërsisht brenda hapësirës që atyre u është ofruar brenda listave zgjedhore”.
Në anën tjetër, Agnesa Haxhiu nga KDI, ka treguar se nga 13 deputetë që kanë garuar për kryetarë komune, vetëm 3 prej tyre kanë arritur të fitojnë.
“Prej këtyre 13 deputetëve që kanë garuar për kryetarë komune, gjashtë prej tyre përveç se ishin deputetë ishin edhe udhëheqëse në Kuvend, si nënkryetar, shef i Grupit Parlamentar ose kryetar Komisioni. Në Kosovë politikanët e kanë bartur sigurinë e deputetit si mundësi e promovimit të pozitave tjera publike”, ka thënë Haxhiu.
/Albanianpost.com
