KDI: Nuk ka qeverisje të mirë pa financa transparente të subjekteve politike

Kuvendi i Kosovës, të martën ka dështuar të votoj projektligjin për financimin e subjekteve politike në mungesë të kuorumit.

Për këtë ka reaguar Instituti Demokratik i Kosovës (KDI), duke shprehur keqardhje për dështimin e votimit në parim të Projektligjit për Financimin e Subjekteve Politike.

Sipas KDI-së, kjo do të i shërbejë edhe më tutje, mungesës së transparencës dhe llogaridhënies financiare, cilësisë së demokracisë, si dhe praktikave të mira qeverisëse.

“Subjektet politike parlamentare – pozitë dhe opozitë – nuk kanë arsye për zvarritjen e mëtutjeshme të këtij projektligji, duke qenë se i njëjti është në përputhje me kërkesat dhe standardet ndërkombëtare, respektivisht Opinionin e Komisionit të Venedikut”.

Në fund, ka apeluar që Projektligji për Financim të Subjekteve Politike të shqyrtohet dhe të votohen në parim sa më parë, duke i hapur rrugë shqyrtimit dhe eventualisht avancimit të tij në periudhën mes dy leximeve.

Ndryshe, kryeministri Albin Kurti, bëri të ditur se me synim arritjen e pajtueshmërisë ndërmjet partive politike për formën përfundimtare të këtij projektligji, Zyra e Kryeministrit ka organizuar tryezë diskutimi, por sipas tij vetëm dy grupe parlamentare i janë përgjigjur ftesës.

“Miratimi i këtij projektligji është pjesë e agjendës evropiane për reforma dhe rekomandim i Raportit të Komisionit Evropian për vendin, por edhe kërkesë e qytetarëve dhe shoqërisë civile për transparencë në financat e partive politike. Si Qeveri jemi zotuar se do ta sjellim këtë projektligj në Kuvend dhe këtë e kemi bërë. Mirëpo, është përgjegjësi e jona kolektive që këtë projektligj ta miratojmë sa më parë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.