KDI-ja kërkon nga Qeveria të bëhet zbatim i drejtë i ligjit për pensionistët, thotë se “po u shkelën të drejtat”  

Instituti Demokratik i Kosovës (KDI), ka vlerësuar se Qeveria e Kosovës është duke shkelur të drejtat e pensionistëve për pension të dyfishtë, ata kanë kërkuar që të bëhet zbatim i drejtë i ligjit.

Përmes një takimi të mbajtur nga KDI-ja në kuadër “Javës së Ndihmës Juridike Falas”, është thënë se ndonëse ekzekutivi konkretisht Ministria e Finanacave, Punës dhe Transfereve ishte ftuar për të marrë pjesë në këtë tryezë, të njëjtit nuk i ishin përgjigjur ftesës.

I pranishëm në këtë takim ishte avokati i popullit, Naim Qelaj, i cili kritikoi veprimet e autoriteteve publike për mosrespektimin e të drejtave të qytetarëve lidhur me këtë çështje.

“Është çështje shumë shqetësuese dhe serioze e që padyshim për Avokatin e Popullit paraqet shqetësim të theksuar kur kem të bëjmë me veprimet e autoriteteve publike karshi qytetarëve të saj”, ka deklaruar Qalaj para të pranishmeve.

Ai shtoi se “zyrtarët e administratës pensionale të Kosovës, detyrohet që qytetarëve t’i japin alternativa të gabuara që mund të hyjnë edhe në dimension të Këshillës Juridike të gabuar”.

Në anën tjetër, kryetari i Këshillit Gjyqësor të Kosovës, Albert Zogaj, ka shprehur shqetësimin e tij për trefishimin e lëndëve në sistemin gjyqësor për shkak të moszbatimit të ligjeve në mënyrë të drejtë.

“Situata e pensionit të dyfishtë ose me dy skema pensionale veçse po merr dimension në procedura gjyqësore dhe besoj që duhet kjo të reflektojë në përmbushje të vullnetshme”, ka thënë Zogaj.

Ai ka kërkuar që të gjitha kategoritë të trajtohen në mënyrë të respektueshme.

“Mirëpo, nuk duhet ta harrojmë asnjëri prej nesh që norma ligjore në fakt e ka edhe dimensionin social dhe human brenda vetës dhe në këtë rast të gjitha skemat sociale ndërtohen mbi këtë koncept. Ky dimension duhet të shtrihet edhe në zbatimin e normës dhe jo në këtë situatë ku njerëzit vendosen në dilemë dhe në vështirësi për realizimin e drejtësisë”.

Nga gjyqtari Rexhep Gashi, u bë e ditur se vetëm gjatë periudhës mars-maj kanë pranuar rreth 1 mijë e 200 padi lidhur me pensione.

Ai e ka përshkruar këtë, “si ngarkesë të madhe për gjykatën”.

Në dhjetor të vitit 2022, Kushtetuesja kishte shfuqizuar paragrafin 2 të nenit 8 te Ligjit nr.04/L-131 për skemat pensionale, sepse është konstatuar se në mënyrë diskriminuese përmes këtij neni mijëra qytetarë duke mos e përmbushur kriterin e përvojës prej 15 viteve pune para janarit të viti 1999 nuk e kanë gëzuar pensionin kontributdhënës, por vetëm atë të moshës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.