Kategoria Superiore U21, ka luajtur tre ndeshjet e radhës të javës së 11. Bie në sy fitorja e Bylisit në fushën e Football Republic. Miqtë shënuan 12 gola dhe pësuan dy. Në sfidat e tjera Dinamo bëri detyrën në shtëpi përballë Turbinës dhe Laçi fitoi me pesë gola në fushën e Kastriotit.
Bylisi përballë Football Republic kishte në fushë një pjesë të madhe të ekipit të parë, të cilët dhe shënuan, si Eridon Qardaku, Arbër Mehmetllari, Xhoi Carkanji, Renato Spahiu, Aleksander Trumci etj.
Qardaku shënoi katër gola. Golat e tjerë erdhën nga Mehmetllari, Spahiu, Ruçi (dy gola), Carkanji, Kodhelaj, Maçolli dhe Preka. Për vendasit shënuan Sukaj dhe Kodra.
Dinamo mposhti minimalisht Turbinën, me golin e Plakut. Laçi fitoi 0-5 në fushën e Kastriotit. Prenga, Bruka, Bytyçi, Hasa dhe Deliu shënuan për kurbinasit.
Më herët ishte luajtur sfida Vllaznia kundër Kukësit, e përfunduar 1-2, për verilindorët. Ditën e mërkurë, datë 3 shkurt, do të luhen sfidat Akademia e Futbollit kundër Teutës dhe Tirana kundër Apolonisë.
Renditjen e Superiores U21, e udhëheqin Laçi dhe Vllaznia me nga 25 pikë, ndiqen nga Kukësi dhe Bylisi me 22 pikë, 19 pikë Dinamo e vendit të pestë, 15 pikë Kastrioti i vendit të gjashtë, 13 pikë Apolonia e vendit të shtatë, 12 pikë Teuta dhe Turbina, që ndajnë vendin e tetë dhe të nëntë, 11 pikë Tirana e vendit të 10, shtatë pikë Shënkolli i vendit të 11, tre pikë Football Republic e vendit të 12 dhe me zero pikë, Akademia e Futbollit në vend të fundit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
