“Karrota” që e pret Serbinë nëse pranon propozimin evropian në dialog: Mercedes hap fabrikë të makinave elektrike – investim prej 2.7 miliardë eurosh

Kompania e veturave Mercedes, ajo e metaleve Rio Tinto, Banka Evropiane për Rindërtim dhe Zhvillim (BERZH) dhe Qeveria e Serbisë janë duke negociuar zbatimin e projektit për ndërtimin e fabrikës së makinave elektrike Mercedes në Serbi, ka mësuar media serbe Demostat nga qarqet diplomatike, transmeton N1.

Vlera e këtij projektit në të cilin merr pjesë BERZH është 2.7 miliardë euro. Makinat e prodhuara në fabrikën në Serbi duhet të përdorin bateri litium, të cilat do të minohen nga kompania australiano-britanike Rio Tinto.

Sipas disa burimeve të mediave, negociatat po i afrohen një marrëveshjeje përfundimtare.

Në takimin e dhjetorit të presidentit serb Aleksandër Vuçiç në Bruksel, me përfaqësues të Mercedes, Rio Tinto dhe BERZH, me rastin e “investimit të madh që duhet të mbërrijë në Serbi”, është rënë dakord “që: “kontrata do të nënshkruhet në fund të shkurtit dhe publiku do të marrë të gjitha informacionet për investimin në muajin mars”.

Sipas informacioneve jozyrtare të portalit serb Nova.rs, kjo marrëveshje që do të lidhet nga Qeveria e Serbisë kap vlerën e rreth 2.7 miliardë eurove.

“Vendimi i gjigantit gjerman për hapjen e një fabrike në Serbi, me garancitë e Bankës Evropiane për Rindërtim dhe Zhvillim, do të ishte një tregues i qartë i drejtimit në të cilin po shkon Serbia – pra drejt Perëndimit. Ardhja e gjigantit gjerman nga Shtutgarti do të dërgonte një mesazh të fortë për investitorët e tjerë të mëdhenj globalë për Serbinë si një destinacion të sigurt për investime”.

Por, kushti për realizimin e këtyre investimeve nga perëndimi është përafrimi i politikës së jashtme dhe të sigurisë me atë të Bashkimit Evropian, me theks të veçantë vendosja e sanksioneve ndaj Rusisë.

Sanksionet kundrejt Rusisë nuk janë kushti i vetëm, gjithashtu për t’u realizuar këto investime; mund të jetë pjesë e “karotës” që i është premtuar Serbisë – në qoftë se tregohet konstruktive në dialogun me Kosovën dhe nëse e pranon planin franko-gjerman (evropian).

Ndërkaq, zyrtarët evropianë ia kanë bërë të qartë lidershipit serb se nëse Serbia nuk e pranon planin evropian, mund të ketë pasoja të shumta, por në masë të madhe do të jenë të dëmshme për ekonominë e saj. Nga ana tjetër, nëse e pranon planin, Serbisë i është bërë e ditur se do të marrë ndihmë ekonomike, por edhe investime në fusha të ndryshme të ekonomisë.

“Ardhja e Mercedes-it në Serbi këtë herë nuk do të kufizohet vetëm në propagandë qeveritare, si në rastin e bashkëpunimit ndërmjet kompanisë gjermane dhe Ikarbus-it serb, por nëse kontrata do të nënshkruhet dhe do të zbatohet”, thonë burimet e medias serbe.

Kjo praktikisht do të thotë se Rio Tinto do të nxjerrë litium në Serbi, edhe pse Qeveria e Serbisë zyrtarisht e pezulloi projektin “Jadar” në fillim të vitit të kaluar për shkak të protestave të aktivistëve për mbrojtjen e mjedisit.

Demostat më herët kishte shkruar se nëse litiumi shfrytëzohet në Serbi, kushti i Qeverisë së Serbisë do të jetë ndërtimi i fabrikës së baterive dhe një fabrike e makinave elektrike. Në atë kohë u tha se Serbia nuk do të lejojë shfrytëzimin e litiumit vetëm për ta eksportuar atë në vende të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.