Kalendari turistik veror, Rama: Në 2030 Shqipëria do jetë vend kampion i turizmit në rajon

Këtë të mërkurë u prezantua Platforma digjitale Kombëtare e Turizmit TEA, e kthyer tashmë në një udhërrëfyes jo vetëm të eventeve në destinacionet turistike të Shqipërisë, po edhe me shumë njësi shërbimin duke kryer detyrën e një sporteli digjital “one stop shop”, me qëllim lehtësimin e qëndrimin e çdo turisti dhe vizitori në vendet e tyre të pushimit.

Kryeministri i Shqipërisë, Edi Rama, gjatë fjalës që mbajti në promovimin e kalendarit turistik veror, tha se shifrat e turistëve që kanë vizituar vendin gjatë muajve të parë të 2024 po rriten me ritme të shpejta.

Ai theksoi se Shqipëria ka hyrë në rrugën e transformimit, ndërsa objektivi kryesor shtoi Rama, është që të Shqipëria brenda vitit 2030 të kthehet në “Evropën e Ballkanit” dhe në një kampione të turizmit në Ballkan.

“Një shifër kam dëshirë ta ndaj me ju, sepse është një shifër tejet domethënës, e paimagjinueshëm deri jo shumë vite më parë, shumë kuptimplotë se çfarë po përpiqemi të bëjmë, por edhe orientuese për si do shkojmë më tej.  Sitet arkeologjike, vetëm më 4 muaj e parë të këtij viti kanë tërhequr 182 mijë vizitorë, ndërkohë parqet kombëtare janë vizituar rreth 800 mijë vizitorë, Këto janë shifra marramendëse po të kemi parasysh se nga jemi nisur. Gjithmonë e rëndësishme për ne është se ku duhet të shkojmë dhe për këtë kemi fiksuar majën e 2030″.

Rama listoi disa projekte infrastrukturore, të cilat do t’i japin frymëmarrje lëvizjes së turistëve nga jugu në veri .

“Shqipëria në 2030 do jetë vend kampion i turizmit në këtë rajon. Do jetë stabilizuar në champions League e Mesdheut, por që do ketë të plotësuara të gjithë ata pjesë të mozaikut, që sot ende mungojnë. Duke u nisur nga infrastruktura, për të cilën ne po bëjmë një punë shumë intensive , Kemi një sezon të ri, që hapet me disa vepra të mëdha, të infrastrukturës që u vihen në dispozicion udhëtarëve dhe turistëve, duke filluar nga Tuneli i Llogarasë, një ide e vjetër, një zoti legjendar i të gjithë forcave politike, i cili këtë sezon do jetë i kalueshëm për ata që shkojnë në jug, duke vazhduar me rrugën e re Orikum-Dukat, që zbulon një pjesë tjetër të panjohur të trupit të mrekullueshëm të Shqipërisë, duke vazhduar me aksin Thumanë-Kashar, një aks i rëndësishëm  edhe për vetë faktin se prurja e lartë e automjeteve nga veroi drejt Tiranës dhe më tutje drejt jugut, në sezonit turistik bëhet e papërballueshme. Vjet ka qenë një torturë për udhëtarët”, tha ai.

Sipas kryeministrit, “platforma digjitale Kombëtare e Turizmit TEA tashmë është kthyer në një udhërrëfyes jo vetëm të eventeve në destinacionet turistike të Shqipërisë, po edhe me shumë njësi shërbimin duke kryer detyrën e një sporteli digjital “one stop shop”, me qëllim lehtësimin e qëndrimin e çdo turisti dhe vizitori në vendet e tyre të pushimit”.

Ndërsa  ministrja e Turizmit dhe Kulturës, Mirela Kumbaro, gjatë fjalës së saj në promovimin e kalendarit turistik ‘Tea’ tha se aplikacioni u vjen në ndihmë turistëve për të gjetur më lehtë shërbimet që ata kërkojnë.

“Vetëm hashtagu Albania, në tik tok nga përdoruesit shqiptar ka bërë që të ketë 3.8 milion postime në këtë aplikacion.  3.3 milionë turistë kemi pritur në këto muajt e parë të viti, ose 40 për qind, këtë shifër e aprovon edhe tregu privat operatorët turistikë, po ashtu bankat nga flukset monetare që hyjnë dhe dalin nga turizmi. ‘TEA’ vjen me një prakticitet më të lehtë sepse vitin e kaluar na tregoi për ca kanë nevojë turistët, duke i dhënë mundësinë me një klikim të vetëm të gjejnë ku mund të hanë, ku mund të gjejnë muze dhe shumë shërbime të tjera”.

Guvernatori i Bankës së Shqipërisë u shpreh se gjatë vitit 2023, numri i turistëve u rrit në 10.1 milionë, ndërsa të ardhurat e siguruara prej tyre arritën në 4.2 miliardë euro.
“Në fakt, referuar të dhënave të Kombeve të Bashkuara, Shqipëria ishte vendi i katërt në botë për ritmin e rritjes së turizmit gjatë vitit 2023.

Ky ritëm rritjeje ka vijuar edhe gjatë muajve të parë të vitit 2024. Tashmë, të ardhurat nga turizmi janë rreth nivelit 20% të PBB-së” tha Sejko, ndërsa shtoi se niveli i sotëm i inflacionit që ka zbritur në 2.2% në muajin maj 2024.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.