Ka vdekur në Ulqin personi i fundit nga komuniteti “afro-ulqinak” – dikur të ardhur nga Afrika
![](https://albanianpost.com/wp-content/uploads/2022/01/afro-ulqinakee-eeee.png)
Të martën në Ulqin në moshën 89-vjeçare ka ndërruar jetë File Kastrati, personi i fundit i komunitetit të ashtuquajtur “afro-ulqinak”, apo “harapë”, që kishin ardhur nga kontinenti afrikan dhe ishin vendosur në Ulqin dhe pjesë të tjera të rajonit.
Portali lokal, Ul-info, ka vendosur në ballinë lajmin e vdekjes së Kastratit, e cila ishte gruaja e fundit që vinte nga dy prindër me ngjyrës.
“Ishte një grua e mrekullueshme, punëtore, fisnike, me buzëqeshje mahnitëse”, thuhet në dedikimin për të.
Ismet Karamanaga, ciceroni i njohur i Ulqinit, ka shkruar se “me pikëllim kujtoi të gjithë takimet dhe bisedat tona, fytyrën shend e verë të Files kur me fjalë të zgjedhura fliste për ulqinakët dhe ulqinaket e moçme”.
“Në këtë mënyrë praktikisht u zhduk ky komunitet dikur i rëndësishëm, i cili këtij qyteti mesdhetar ia ka dhënë të gjitha, e më së shumti kosmopolizmin, solidaridetin, bukurinë, hijeshinë dhe sharmin”.
“Mirëpo, mbeten dëshmitë, fotografitë, librat, vallet, varret dhe tyrbet e Zezakëve të Ulqinit. Kjo mjafton të përshkruhet imazhi se si ishte dikur ky qytet me Afroulqinakët e tij të mrekullueshëm”, shkruan ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com