![](https://albanianpost.com/wp-content/uploads/2024/05/bbbbbbbbb.jpg)
Kryetari i Zveçanit, Ilir Peci, e ka shkarkuar nga pozita e nënkryetares Natasha Tomaniç, pasi vendimi është marrë këtë të enjte në mbledhjen e Kuvendit Komunal të kësaj komune.
Shkarkimin e Tomaniç e ka konfirmuar për Albanian Post kryetari Peci, i cili ka theksuar se ky vendim është marrë pasi nënkryetarja ka kaluar disa herë kompetencat e saj në punë.
“Ka bërë presion të vazhdueshëm ndaj zyrtarëve serbë në komunë te Zveçanit, ku si rrjedhojë tre zyrtarë serbë kanë dhënë dorëheqje ditëve të fundit”, tha Peci.
Ndryshe, gjatë muajit mars të këtij viti, Tomaniç-it, i janë djegur dy lokale në qendër të komunës së Zveçanit.
“Lidhur me rastin ankuesja dyshon se zjarri i është vënë qëllimshëm nga persona të dyshuar. Sipas ankueses, vlera e dëmit është e lartë. Rasti është duke u hetuar”, thuhet në raportin e Policisë.
Për rastin në fjalë ishte deklaruar edhe zëvendësministri i Administrimit të Pushtetit Lokal, Arbër Vokrri, i cili situatën e ka cilësuar si tentim i kotë për t’i frikësuar “serbët e çliruar nga thundra e terroristëve të Listës Serbe”.
“Kjo vije një muaj pas bllokimit të paligjshëm të biznesit të familjes së zëvendëskryetares së Mitrovicës Veriore Katarina Adzançiç nga regjimi i Vuçiç-it dhe dy muaj pas djegies së veturës së kryesuesit të Kuvendit Komunal të Leposaviqit, Gorski Buriç”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com