Juventus-i thuhet se po shikon portierin e Monza-s, Michele Di Gregorio për verën dhe synon të mposhtë konkurrencën nga klubet e tjera.
Portieri italian ka performuar jashtëzakonisht mirë, pasi ka arritur 11 porta të pastra këtë sezon, duke e shtyrë Juventus-in të hedhë bazat për një lëvizje, pavarësisht se ka dy portierë të vlefshëm si Wojciech Szczesny dhe Mattia Perin, të dy mbi 30 vjeç.
“La Gazzetta dello Sport” raporton se ndërsa Di Gregorio u rrit në akademinë e të rinjve të Inter-it duke pasur idhull Samir Handanovic-in, ai kurrë nuk do të refuzonte një mundësi nga Juventus-i.
Monza e nënshkroi portierin italian në vitin 2022 për 4 milionë euro dhe tani e vlerëson atë të paktën pesë herë më shumë, rreth 20 milionë euro. Inter-i do të mbajë një përqindje të çdo rishitjeje në të ardhmen, ndërsa në verë, disa skuadra të Serie A mund të kenë nevojë për një portier të ri.
Gazeta përshkruan se si “askush te Juventus-i nuk ka ndërmend të anashkalojë Szczesny-n”, i cili po kalon një sezon tjetër vendimtar në karrierën e tij.
Portieri polak mund të rinovojë edhe për një vit (kontrata aktuale deri në verën e 2025), duke ndjekur shembullin e disa shokëve të skuadrës që kanë pranuar paga më të ulëta. Mirëpo, nëse kjo nuk ndodh, nuk përjashtohet ndryshimi i klubeve, veçanërisht nëse vjen një ofertë tërheqëse, e cila i mundëson klubit të kursejë 6.5 milionë euro neto pagë.
Ideja për bardhezinjtë është të përsërisin atë që u bë vite më parë me çiftin Gianluigi Buffon-Szczesny, duke i lejuar Di Gregorio një vit “praktikë” pas portierit polak. Përndryshe, ai mund të pretendojë vendin e parë me Perin si rezervë të tij.
Megjithatë, për të siguruar Di Gregorio, Juventusi duhet të fitojë para nga largimi i Szczesny-t ose Perin-it.
Pavarësisht se po tenton të nënshkruajë me portierin e Monza-s, Juve pritet të përballet me rivalë si Napoli dhe Roma, të cilët po e ndjekin atë, si dhe Inter-i, megjithëse aktualisht janë të mbuluar me Yann Sommer dhe nuk kanë ndërmend të shpenzojnë për një portier të dytë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
