Juventus-i kërkon të shtojë kontigjentin e portugezëve në skuadër

Juventus-i ka hedhur sytë te mbrojtësi i djathtë i Lille-s, Tiago Santos, në kërkimin për të konsoliduar korsinë e djathtë, një pozicion që prej kohësh nuk ka qenë në lartësinë e duhur.

Portugezi i ri, vetëm 22 vjeç, ka tërhequr vëmendjen e klubit italian jo vetëm për paraqitjen e tij në Ligue 1, por edhe për shkathtësinë e tij.

Santos, i cili mund të luajë si në mbrojtje ashtu edhe në pozicione më sulmuese, ka qenë një element kyç për Lille-n, duke grumbulluar tre gola dhe tre asistime në 51 ndeshje.

Interesi i Juventus-it për Santos nxitet edhe nga marrëdhënia e tyre me agjentin Jorge Mendes, me të cilin klubi tashmë ka mbyllur marrëveshje të mëdha në të kaluarën.

Pas afrimit të Francisco Conceicao nga Porto, lidhja mes bardhezinjve dhe përfaqësuesit të famshëm portugez është forcuar dhe tashmë “Zonja e Vjetër” i beson Mendes-it për mbylljen e këtij operacioni të ri, raporon “Fichajes”.

Pritet që Juve të kërkojë të finalizojë ardhjen e mbrojtësit të krahut në merkaton e ardhshme dimërore.

Skuadra e drejtuar nga Thiago Motta ka treguar shenja përmirësimi në lojën e saj, por Juventus-i është ende në kërkim të soliditetit dhe thellësisë në disa pozicione.

Shtimi i Tiago Santos mund të jetë çelësi për kthimin e klubit në ballë të futbollit evropian dhe zgjidhjen e një prej dobësive të tij të mëdha të kohëve të fundit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.