Julio Iglesias dhe Netflix arrijnë marrëveshje për serialet rreth jetës ikonike të këngëtarit

Këngëtari ikonë spanjoll Julio Iglesias është bashkuar me Netflix për të zhvilluar një seri mbi jetën dhe karrierën e tij.

Projekti do të realizohet me pjesëmarrjen e plotë të Iglesias në procesin krijues për herë të parë, me 80-vjeçin duke premtuar se do të “ndajë gjithçka rreth jetës së tij dhe trajektores së pabesueshme muzikore”, u tha në një njoftim, shkruan Variety, transmeton AlbanianPost.

Aktualisht në zhvillim, seriali do të “tregojë historinë se si Julio Iglesias u bë artisti i parë jo-anglez që hyri në tregjet amerikane dhe aziatike dhe u shndërruar në një yll universal, i cili është ndër pesë shitësit më të mëdhenj të disqeve në histori”, vazhdon njoftimi.

Brenda serisë do të pasqyrohen fakte që i dhanë Iglesias, epitetin e ikonës.

“Gjatë gjithë karrierës së tij artistike më shumë se 55 vjeçare, Julio Iglesias ka regjistruar dhe kënduar në 12 gjuhë dhe ka lidhur fansa nga e gjithë bota, duke u bërë artisti i parë spanjoll me shtrirje universale që këngët e tij këndohen në të gjithë planetin”, u tha tutje në njoftim.

E lidhur me këtë zhvillim ka reaguar edhe Iglesias, i cili është shprehur i vendosur për të shpalosur historinë e tij për Netflix.

“Pas shumë spekulimeve, librave dhe dokumentarëve në të cilët nuk jam përfshirë, për herë të parë kam vendosur t’i tregoj të vërtetën për jetën time një kompanie universale si Netflix”, tha Iglesias në një deklaratë.

“Pas shumë diskutimesh, më në fund, mjaftoi një letër shumë prekëse që më dërgoi Bela Bajaria (shefi i përmbajtjes në Netflix) për të më bindur se Netflix ishte kompania ideale për të zhvilluar këtë projekt. Ndjehem mirënjohës për shumë njerëz nga shumë vende që më kanë mbështetur dhe më kanë rritur jetën”, përfundoi ai.

Në anën tjetër, Diego Avalos, nënkryetar i përmbajtjes në Netflix, tha se – “Julio Iglesias na ka besuar ne për të treguar historinë e tij. Ne i jemi shumë mirënjohës për bujarinë e tij. Të gjithë e dimë se talenti dhe këmbëngulja e tij janë unike në botë. Tani do të kemi mundësinë të shohim përtej dritave, fotot në revista, tabelat e arta dhe të njohim realisht në thellësi një person të jashtëzakonshëm që ka shoqëruar dhe do të shoqërojë shumë breza në çdo cep të planetit”.

Iglesias nuk u përpoq të bëhej këngëtar menjëherë, ai filloi në radhët e të rinjve të Real Madridit përpara se një aksident t’i jepte fund karrierës së tij futbollistike.

Më pas Iglesias iu kthye muzikës, duke u bërë së shpejti një nga shitësit më të mirë të disqeve në historinë e muzikës.

Një superstar botëror, Iglesias ka regjistruar këngë në më shumë gjuhë në botë dhe është njohur si artisti i huaj më i njohur në Kinë, Brazil, Francë, Itali dhe më shumë.

Në vitin 2019, ai u nderua në “Grammy” me çmimin për arritje jetësore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.