Lajme

Jemeni, Egjipti dhe Libani përballen me ‘katastrofë’ ushqimore në mes të luftës në Ukrainë, thotë OKB


Jemeni, Egjipti dhe Libani janë ndër vendet që përballen me “një katastrofë mbi një katastrofë” pas pushtimit të Ukrainës nga Rusia. Kjo ka qenë deklarata e shefit të Agjencisë së Ushqimit të OKB-së.

David Beasley, drejtor ekzekutiv i Programit Botëror të Ushqimit, i tha Këshillit të Sigurimit të OKB-së se njerëzit do të ishin të uritur nëse bota nuk do të rriste nivelet e ndihmës humanitare, sepse shpenzimet e programit po rriteshin.

Shumë vende të Lindjes së Mesme mbështeten tek Ukraina për pjesën më të madhe të importeve të grurit.

Beasley tha se ndikimi global i luftës do të ishte “përtej çdo gjëje që kemi parë që nga Lufta e Dytë Botërore”, sepse shumë nga fermerët ukrainas që prodhojnë një sasi të konsiderueshme të grurit në botë tani po luftojnë me rusët.

Agjencia e tij ushqente 125 milionë njerëz përpara pushtimit rus të Ukrainës më 24 shkurt.

Sakaq Beasley tha se është dashur të fillojë të shkurtojë racionet e tyre për shkak të rritjes së kostove të ushqimit, karburantit dhe transportit.

Ai tha se në Jemen, ku ndarja e ushqimit për 8 milionë njerëz u shkurtua me 50 për qind, “tani po shikojmë të shkojmë në racione zero”.

Lufta në Ukrainë po e kthen “një ekonomi të pasur në mjerim” për miliona njerëz të saj, ndërsa po shkatërron vende si Egjipti, që normalisht blen 85 për qind të drithit nga Ukraina dhe Libani ku 81 për qind e furnizimeve në 2020-ën erdhi nga Ukraina.

Ukraina dhe Rusia prodhojnë 30 për qind të furnizimit me grurë në botë, 20 për qind të misrit dhe 75 deri në 80 për qind të vajit të farës së lulediellit. Programi Botëror i Ushqimit blen 50 përqind të drithit të tij nga Ukraina, tha ai.

Sipas tij lufta do të rrisë shpenzimet mujore të agjencisë me 71 milionë dollarë për shkak të rritjes së kostove të ushqimit, karburantit dhe transportit.

Kjo do të arrijë në 850 milionë dollarë për një vit dhe do të thotë se do të ketë “katër milionë njerëz më pak që do të jemi në gjendje të arrijmë”.

Ndër të tjera Beasley tha se Programi Botëror i Ushqimit po arrin rreth 1 milion njerëz brenda Ukrainës me ushqim tani. Ai tha se shpresonte që do të arrinte 2.5 milionë gjatë katër javëve të ardhshme, 4 milionë deri në fund të majit dhe 6 milionë deri në fund të qershorit.

Kostoja është rreth 500 milionë dollarë për tre muajt e parë dhe “ne jemi me rreth 300 milionë dollarë, kështu që do të na duhet të rritemi”, tha ai.

Ai tha se fokusimi në Ukrainë nuk duhet ta shtyjë komunitetin ndërkombëtar të neglizhojë Afrikën, veçanërisht Sahelin dhe Lindjen e Mesme, sepse “përndryshe, do të keni migrim masiv” në të gjitha pjesët e Evropës.

“Nëse i japim fund konfliktit, adresojmë nevojat, ne mund të shmangim urinë, destabilizimin e kombeve dhe migrimin masiv”, tha ai.

“Por nëse nuk e bëjmë, bota do të paguajë një çmim të madh dhe gjëja e fundit që duam të bëjmë si Programi Botëror i Ushqimit është të marrim ushqim nga fëmijët e uritur për t’ua dhënë fëmijëve më të uritur”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore