Jarinje: Policia provokohet me këngë nacionaliste serbe

Serbët protestues në Veri të Kosovë tash e sa ditë po vazhdojnë provokimin e policisë së Kosovës, sa herë atyre iu duhet të kalojnë mes protestuesve për të bërë ndërrimin dhe furnizuar me ushqime.

Meqë rruga është bllokuar me kamionë, pjesëtarët e policisë s’kanë se si të lëvizin drejt pikës së tyre, përveçse të futen kah barrikada në këmbë.

Aty, siç shihet edhe në këtë video, pos shprehjeve fyese në raport me ta, tash protestuesit kanë filluar edhe të lëshojnë tërë kohën këngë nacionaliste serbe.

Video tregon situatën në Jarinje ku derisa kalojnë policët, dëgjohet muzika me tekste nacionaliste.

Ndërsa në ditën e katërt të protestimeve të serbëve në pikat kufitare të Jarinjes dhe Bërrnjakut janë intensifikuar bllokadat të shkaktuara nga protestuesit e mbledhur serbë.

“Disa qindra serbë janë ende në vendkalimet kufitare në Veriun e Kosovës, pavarësisht të ftohtit the shiut, ata janë të vendosur të mos largohen nga magjistralja. Bllokada është 3 kilometra e gjatë dhe qytetarët kanë sjellur edhe më shumë kamionë”, shkruan Kosovo-Online

Që nga orët e hershme të mëngjesit të 20 shtatorit, Policia e Kosovës, konkretisht Njësia Speciale Operative është vendosur në pikë kalimin e vjetër kufitar në mes të Kosovës dhe Serbisë, në Jarinje të komunës së Leposaviçit, për të filluar reciprocitetin e targave.

Të gjitha veturat që deri më tani kanë pasur targa të Serbisë, duhet t’i zëvendësojnë ato me “RKS”, targa të Republikës së Kosovës”, nëse duan të qarkullojnë brenda vendit

Kurse, Ministria e Punëve të Brendshme e Qeverisë së Kosovës ka njoftuar se prej 20 shtatorit e deri në përfundim të ditës së mërkurë, më 22 shtator, ka lëshuar 6 mijë e 375 targa të përkohshme në të gjitha Pikat e Kalimit Kufitar (PPK) dhe Qendrat e Regjistrimit të Automjeteve në tërë territorin e Kosovës.

Sipas njoftimit të Ministrisë, mbi 3 mijë targa të përkohshme janë lëshuar në të gjitha vendkalimet kufitare Kosovë – Serbi, ndërkaq, numri më i madh i tyre është lëshuar në vendkalimet kufitare Dheu i Bardhë dhe Merdare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.