Jannik Sinner dhe një rivalitet i ri i tenisit të klasit botëror

Italiani fitoi titullin ATP Miami Open Masters 1000 ndaj bullgarit Dimitrov dhe u ngjit në vendin e dytë në renditjen botërore të ATP, menjëherë pas të madhit Novak Djokovic. Rivaliteti i tij me Carlos Alcaraz mund të jetë kapitulli i ri në tenis.

Jannik Sinner fitoi kampionatin ATP Miami Open Masters 1000, duke siguruar një fitore 6-3, 6-1 ndaj bullgarit Grigor Dimitrov në ndeshjen finale në stadiumin “Hard Rock”, në 72 minuta.

Pas Australian Open dhe Rotterdam Indoors, ky Masters 1000 është titulli i tij i tretë i sezonit dhe e çon atë në një moment historik mbresëlënës në karrierë, ndërsa ngjitet në vendin e dytë në renditjen botërore ATP, përpara yllit spanjoll në rritje Carlos Alcaraz.

“E nisa sezonin me të vërtetë, shumë mirë. Nuk e kisha menduar kurrë. Të jesh numri dy është një ndjenjë e mahnitshme. Nuk e kisha menduar kurrë se do të arrija këtë pikë”, tha një Sinner i kënaqur.

22-vjeçari këmbëngul se qëndron i përqendruar gjatë ndeshjeve: “Për shkak të personalitetit tim, përpiqem të qëndroj gjithmonë i qetë, por nuk mund të rri duarkryq, duhet të sulmosh dhe të jesh i fokusuar mendërisht në çdo situatë në fushë”.

Një figurë gjithnjë e më popullore në rrjetet sociale, Sinner ka fituar 25 nga 26 ndeshjet e tij të fundit. Lojtari i vetëm që e mundi atë këtë sezon është Carlos Alcaraz në gjysmëfinale në Indian Wells.

Kundërshtari i fundit i Sinner në Miami, Dimitrov, tha: “Unë mendoj se Jannik po luan qartë tenis të jashtëzakonshëm për momentin. Ai është lojtari më i mirë në botë për momentin”.

Numri dy i botës ishte më i kujdesshëm në deklaratë.

“Unë kam një ekip të madh, dhe ne e dimë se çfarë duhet të përmirësojmë me afrimin e sezonit në fushë dheu. Zakonisht kam disa vështirësi atje, kështu që do të shohim se çfarë mund të bëj këtë sezon (…) sikur kam mësuar shumë gjëra që nga viti i kaluar”, theksoi ai.

Trajneri i Sinner, Darren Cahill u shpreh: “Unë mendoj se tenisi është në duar të shkëlqyera për momentin me lojtarë si ata dy (Sinner dhe Alcaraz) dhe shumë lojtarë të tjerë që do të mbajnë pishtarin përmes një brezi që ne kemi qenë kaq me fat ta shohim gjatë 20 viteve të fundit”.

Pavarësisht nga niveli i lartë i lojës së Sinner, ish-trajneri i Lleyton Hewitt beson se ka ende shumë hapësirë për përmirësim.

Jannik Sinner, pasardhësi i ‘Treshes së Madhe’?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.