Izolohen disa vatra zjarri në Sazan, kërkohet edhe angazhimi vullnetar për emergjencat

Disa vatra zjarri – të paktën ato më të rrezikshmet – janë izoluar nga puna e Forcave të Armatosura, të cilat gjatë gjtihë natës kanë luftuar me flakët, në një terren shumë të vështirë për natyrën e relievit që ka ishulli shqiptar.

Sipas njoftimit nga ministri i Mbrojtjes, Niko Peleshi, ndërhyrja për në vatrat e mbetura është edhe më e vështirë, por puna po vijon.

Nëpërmjet një statusi në median e tij sociale Facebook, Peleshi vlerëson shqetësimet dhe mendimet mbi çështjen, por thekson se janë ekspertët, ata të cilët e vlerësojnë situatën.

“I vlerësoj të gjitha shqetësimet dhe mendimet e shprehura pa teklif, por ne mbështetemi tek ekspertët e fushës që vlerësojnë se teknika më efikase në rastin e zjarrit në ishullin e Sazanin është izolimi i vatrave duke krijuar breza të shpyllëzuar rreth vatrës”, shkruan ai.

Ndër të tjera, ministri thekson edhe bashkëpunimin e vazhdueshëm me Mekanizmin Evropian të Mbrojtjes Civile, me të cilët është ndërtuar një marrëdhënie për aktivizimin e mbështetjes me mjete ajrore shtesë, nëse kjo gjë shihet si e nevojshme.

Po ashtu, edhe gjatë muajve të verës, i njëjti mekanizëm do të funksionojë.

Prioritet sipas tij mbetet mbrojtja e banorëve dhe më pas e florës dhe faunës në zonë, apo e trashëgimisë natyrore dhe historike të vendit.

Thirrja e fundit, ishte edhe ajo për vullnetarizëm, pasi vera që vjen parashikohet të jetë me temperatura tepër të larta.

“Fatkeqësisht edhe kjo verë do të jetë shumë e nxehtë. Ne do të jemi përkrah bashkive për të mbështetur përballimin e emergjencave të mundshme. Por kemi nevojë edhe për vullnetarizëm dhe angazhim nga të gjithë për të përballuar së bashku situatat e emergjencave”, përmbyll ministri.

Me zjarret në ishullin e Sazanit kanë qenë të angazhuar prej ditës së djeshme 61 efektivë të forcave të ndryshme. Teksa, rotacione për t’i dhënë kohë pushimi punonjësve, janë bërë edhe gjatë natës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.