Iu tha më prisni 10 ditë, Arben Vitia ka muaj që s’po iu lajmërohet punëtorëve teknikë dhe atyre të sigurimit fizik që punojnë në institucione shëndetësore

Kanë kaluar gjashtë muaj, por premtimi ndaj punonjësve teknikë dhe punëtorëve fizikë në Qendrën Klinike Universitare të Kosovës (QKUK) për rritje pagash e benefite të tjera, nga ministri i Shëndetësisë, Arben Vitia, vazhdon të mbesë vetëm kaq, premtim.

Premtimi i ministrit erdhi si përgjigje ndaj kërkesës Federatës Sindikale të Punëtorëve Teknikë, ku përfshihej rritja e pagave më së paku 450 euro dhe çdo stimulim i punëtorëve shëndetësorë publikë, të jetë edhe për kompanitë që kryejnë shërbime teknike në spitale dhe Qendrat e Mjekësisë Familjare (QMF) e gjithashtu t’u bëhet edhe pagesa e stazhit të punës.

Ata kishin kërkuar të largohet participimi për kontrollet që bëhen në institucionet shëndetësore të punëtorëve teknikë që kryejnë shërbime për spitalet në Kosovë, të kthehen nën menaxhim të spitaleve këta punëtorë dhe t’u mundësohet ushqim falas në mensat e spitaleve.

Të gjitha këto u dorëzuan më 21 shkurt dhe nga atëherë Vitia, i la në pritje punonjësit.

“Jemi vetëm spektatorë, s’jemi informuar për asgjë”

Kryetari i Sindikatës së Pavarur të Sektorit Privat të Kosovës, Jusuf Azemi, në një bisedë për Albanian Post sqaron se ka një tender për pagën e punëtorëve, por i cili vazhdon të jetë i hapur.

Në shpresë të realizimit të këtij tenderi, ai thotë se në këtë kohë s’u lejohet që flasin, çka do të nënkuptohej si presion ndaj institucioneve.

“Tenderi vazhdon të jetë i hapur për pagën e punëtorëve dhe duke u marrë me këtë tender me pagën e punëtoreve jemi në një fazë të specifikimit dhe nuk guxojmë të bëjmë asgjë, sepse është një formë ligjore që nuk na lejon as të bëjmë presion”.

“Sa e kanë paraparë pagën ne nuk mund ta dimë, por na mbetet vetëm të presim deri sa të përfundoj çështja e tenderimit”, thotë Azemi për AP, me shpresë se nuk vazhdohet në pafundësi me pritje.

“Ne tash jemi vetëm spektatorë”, deklaron.

“Nuk e dimë se kur do të përfundoj çështja e tenderimit”.

Ndërsa, thotë se kur kishin dorëzuar kërkesat ato ishin pranuar nga ministri.

“Vitia kishte pranuar kërkesën dhe kishte kërkuar 10 ditë dhe prej atëherë ajo çka kishte kërkuar ishte që kërkesat t’i dërgohen edhe përmes e-mailes dhe dje e kemi dorëzuar sërish në mënyrë që t’i kujtohen premtimet që na kishte dhënë”.

“Ministria një gjë të tillë mund të realizoj vetëm përmes bashkë-financimit”

Por, të paqartë një kërkesë të tillë e ka anëtari i Komisionit për Shëndetësi, Shemsedin Dreshaj.

Sipas tij, punëtorët teknikë dhe fizikë në QKUK duhet të kërkojnë rritje të pagës vetëm nga kontraktorët privatë që i kanë angazhuar dhe jo edhe nga ministria e Shëndetësisë.

“Punëtorëve teknikë ose punëtorët e mirëmbajtjes në Qendrën Klinike Universitare të Kosovës, janë kontraktorë privatë dhe për këtë arsye duhet që të paguhen nga kontraktori privat dhe jo nga Ministria e Shëndetësisë”, thotë Dreshaj për Albanian Post.

Ai tregon një mënyrë se si do të mund të realizohej ngritja e pagës së tyre, mirëpo që deri tani asnjëherë nuk është aplikuar në Kosovë.

“Ministria një gjë të tillë mund të realizojë vetëm përmes bashkë financimit, por që është vështirë e realizueshme dhe deri tani asnjëherë nuk është realizuar”.

“Nëse nuk rriten pagat, punëtorët teknikë largohen nga spitalet”

Në muajin shkurt Azemi, në një përgjigje për AP kishte paralajmëruar se në rast se nuk do të ketë ngritje të pagave, atëherë punëtorët do të largohen.

“Realisht nëse nuk lëvizin pagat ne do të lirojmë punëtorët, sepse pronarë të kompanive kanë ardhur tek ne dhe kanë kërkuar deri në 200 punëtorë dhe kanë propozuar oferta të ndryshme”.

Ai po ashtu kishte pohuar se kompani të ndryshme kanë propozuar oferta për punëtorët e njëjtë që punojnë në këto institucione për të kryer punën e ngjashme, por me paga më të larta.

“Do të bisedojmë për punëtorët që punojnë në spitale, kryesisht punëtorët teknikë dhe ata të sigurimit fizik. Do t’i rekomandojmë ofertë për rritjen e pagave sepse kemi një ofertë nga kompanitë e tjera me paga më të larta rreth 400-450 euro për të njëjtën punë, ndërsa në spitalet e QKUK-së punëtorët paguhen në pagë prej 270 euro”.

Pas publikimit të vlerës së koeficientit për ligjin e pagave nga Qeveria e Kosovës, sektori privat më 1 shkurt kishte dalur me kërkesë që punëtorët teknikë dhe ata të sigurimit fizik që janë të punësuar nga ky sektor të paguhen duke u bazuar në koeficientin që është caktuar nga ekzekutivi.

Kërkesa ishte bërë nga kryetari i Federatës Sindikale e Punëtorëve Teknikë të Sektorit Privat të Kosovës (FSPTSPK), Jusuf Azemi, përmes një letër dërguar kryeministrit Albin Kurti, dhe ministrit të Financave, Hekuran Murati.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.