“Ishte në Kroaci kur u vra Ivanoviç”, Prokuroria Speciale tërhiqet nga ndjekja penale ndaj Rade Basaras

Prokuroria Speciale është tërhequr nga ndjekja penale ndaj Rade Basara-s i akuzuar për vrasjen e politikanit serb nga Kosova, Oliver Ivanoviç.

Në fjalën përfundimtare, prokurori Burim Çerkini, ka thënë se në mungesë të provave tërhiqet nga ndjekja penale ndaj Basaras, meqë ky i fundit në kohën e vrasjes nuk ka qenë në Mitrovicë, por ishte në Kroaci.

“Si Prokurori Speciale duke u bazuar në mungesë të provave për të akuzuarin Rade Basara tërhiqemi nga ndjekja penale”, tha Çerkini, raporton Betimi për Drejtësi.

Ndërsa për të akuzuarit tjerë, ai theksoi se mbetet ne tërësi pranë aktakuzës derisa theksoi se nga administrimi i provave, dëgjimi i dëshmitarëve dhe provave materiale është vërtetuar se pesë të akuzuarit tjerë kanë kryer veprën penale me të cilën ngarkohen.

Çerkini propozoi që të akuzuarit Marko Roshiç, Nedelkjo Spasojeviç, Dragisha Markoviç, Zharko Jovanoviç dhe Silvana Arsoviç të shpallen fajtorë dhe të dënohen sipas ligjit.

Sipas aktakuzës, të akuzuarit duke vepruar si grup kriminal me qëllim të shtrirjes së kontrollit në pjesën veriore të Mitrovicës, si në jetën politike dhe ekonomike dhe veprimtarinë e përgjithshme të grupit kriminal të organizuar, kanë vepruar me dashje dhe dijeni për të kryer veprën penale të vrasjes së rëndë.

Ivanoviç u vra më 16 janar të vitit 2018 para ndërtesës së partisë në Mitrovicën e Veriut – komunë e banuar me shumicë serbe – në pjesën veriore të Kosovës.

Përkundër faktit se hetimet për vrasjen e politikanit serb janë duke vazhduar në Kosovë dhe Serbi, çështja ende nuk është zbardhur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.