Ish-shtëpia e Marilyn Monroe shpëtohet nga rrënimi dhe shpallet monument historik e kulturor i Los Anxhelos-it

Këshilli i Qytetit të Los Anxhelosit votoi unanimisht për të ruajtur shtëpinë e modeles dhe aktores së ndjerë amerikane, Marilyn Monroe në Brentwood, ku ylli jetoi dhe vdiq, duke e shpallur një Monument Historiko-Kulturor, dhe duke e shpëtuar atë nga rrënimi.

Votimi i dha fund një sage gati njëvjeçare dhe përpjekjeve për të shpëtuar shtëpinë nga shkatërrimi, shkruan CNN, transmeton AlbanianPost.

Verën e kaluar, Departamenti i Ndërtimit dhe Sigurisë i qytetit lëshoi një leje për prishjen e shtëpisë.

Këshilli i qytetit më pas miratoi njëzëri mocionin urgjent të Këshilltares Traci Park për të bllokuar prishjen dhe për të filluar procesin e shpalljes së shtëpisë si një ndërtesë historike.

Park përfaqëson distriktin ku ndodhet shtëpia.

Votimi i kësaj jave për ruajtjen ishte hapi i fundit në procesin e shpalljes, tha departamenti i planifikimit të qytetit për CNN.

Gjatë një fjalimi para këshillit përpara votimit, Park i nxiti kolegët e saj të ruanin këtë pikë referimi të LA.

Ajo e quajti shtëpinë, ashtu si Monroe, “ikonike”.

“Ka gjasa që asnjë grua në histori apo kulturë të mos kapërcejë imagjinatën e publikut ashtu siç bëri Marilyn Monroe. Edhe pas gjithë këtyre viteve, historia e saj ende rezonon dhe frymëzon shumë prej nesh sot”, tha ajo.

“Humbja e këtij pjesë historie, e vetmja shtëpi që Marilyn Monroe zotëroi ndonjëherë, do të ishte një goditje dërrmuese për ruajtjen historike dhe për një qytet ku më pak se 3% e shpalljeve historike janë të lidhura me trashëgiminë e grave”, shtoi ajo.

Park tha se nuk e ka marrë këtë çështje lehtë dhe se ka qenë në komunikim me banorët e afërt për shqetësimet e tyre mbi trafikun dhe sigurinë.

Ajo paraqiti një tjetër mocion për të vlerësuar kufizimet e autobusëve turistikë në rrugë dhe zonat përreth.

“Ekipi im dhe unë kemi punuar ngushtë me pronarët e pronës për të vlerësuar mundësinë e zhvendosjes së shtëpisë në një vend ku publiku mund të vizitojë dhe të kalojë kohë”, tha ajo.

“Unë mbetem shpresëplotë dhe e angazhuar për të punuar me pronarët e pronës për të parë nëse kjo mund të bëhet në të ardhmen, por sot, le të ruajmë këtë pjesë thelbësore të historisë dhe kulturës së LA”, shtoi ajo.

Los Angeles Conservancy, një organizatë jofitimprurëse e përkushtuar për ruajtjen e vendeve historike në qytet, e quajti votimin një “sukses”.

“Kjo shpallje është dëshmi që avokatia e komunitetit funksionon”, tha organizata në një postim në Instagram, duke falënderuar Park për përpjekjet e saj.

Shtëpia e Monroe u ndërtua në vitin 1929 dhe vlerësohet rreth 8 milionë dollarë, sipas regjistrave të pronës.

Monroe jetoi atje vetëm për disa muaj përpara se të vdiste në vitin 1962 në moshën 36-vjeç, ajo vdiq në shtëpi pas një mbidoze të barbiturateve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.