Ish-ministrit serb s’i pëlqen armatimi i Kosovës: Sfidë e re për rajonin

Si një lajm jo të mirë për rajonin e ka cilësuar ish-ministri i mbrojtjes së Serbisë, Dragan Shutanovac, pranimin e kërkesës së Qeverisë së Kosovës nga ana e Shteteve të Bashkuara të Amerikës për blerjen e raketave anti-tank, Javelin dhe pajisjeve të tjera përkatëse në vlerë prej 75 milionë dollarë.

Sipas tij me blerjet e fundit të armëve dhe pajisjeve ushtarake, përfshirë dronët turq dhe veçanërisht pajisja e Forcës së Sigurisë së Kosovës me raketa anti-tank nga amerikanët mund të konsiderohet si forcim i FKS-së, një fakt i cili, për Shutanovac, paraqet një sfidë të re të sigurisë në rajon.

“Militarizimi i Kosovës nuk është lajm i mirë si për Beogradin ashtu edhe për vendet përreth, veçanërisht për Maqedoninë e Veriut, e cila tashmë është përballur me rebelime të armatosura që synojnë shkëputjen e një pjese të territorit dhe formimin e Shqipërisë së Madhe”, ka pretenduar Shutanovac.

Për Shutanovac është e qartë se lëvizja e fundit e SHBA-ve ka indinjuar mjaft shumë Serbinë.

Departamenti amerikan i Shtetit konfirmoi se Kosova kërkoi që të blejë sistemin raketor Javelin në vlerë prej 75 milionë dollarë amerikanë, ndërsa sipas Agjencisë së Bashkëpunimit për Sigurinë dhe Mbrojtjen (DSCA), në pako përfshihen gjithsej 246 raketa anti-tank Javelin FGM-148F dhe 24 njësi për lëshimin e raketave.

Vlera e 246 raketave “Javelin” që Kosova dëshiron t’i blejë është 75 milionë dollarë, zbulon DASH-i

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.