Ish-krerët e UÇK-së në Hagë kanë pranuar ta takojnë Konjufcën

Ish-krerët e Ushtrisë Çlirimtare të Kosovës të akuzuar për krime lufte që po mbahen në paraburgim në Hagë, kanë pranuar ta takojnë kryetarin e Kuvendit të Kosovës, Glauk Konjufcën.

Sipas burimeve të RTK-së, Konjufca do të takojë Hashim Thaçin, Kadri Veselin, Jakup Krasniqin e Rexhep Selimin, por ende nuk dihet data e takimit.

Ndërsa më 2 qershor, Konjufca pati paralajmëruar një vizitë në Hagë pasi ka thënë se krerët e UÇK-së po mbahen të izoluar.

“Besoj që Apeli do ta rrëzojë këtë dënim shumë të lartë për zotëri Haradinajn dhe zotëri Gucati. Pra, ishte një vendim që ndonëse nuk mund ta kthejmë prapa, se nuk kemi kurrfarë ndikimi në GjS, megjithatë duhet ta shprehim pakënaqësinë tonë lidhur me diçka që perceptimin tim, m’u duk krejtësisht i padrejtë , sepse nuk ka të bëjë me substancën, me aktakuzën që ka Gjykata Speciale, por me kategorinë e rrjedhjes së dokumenteve apo të ofendimit”.

Konjufca është pyetur nëse krerët e UÇK-së do ta refuzojnë për vizitë, siç patën bërë me ministren e Drejtësisë, Albulena Haxhiu, por ai ka thënë se “në relacionet tona, ne nuk mund të jemi peng i grindjeve tona që kemi pasur rreth politikave shtëpiake që kanë pasur të bëjnë me Republikën e Kosovës në të kaluarën”.

Gjatë muajit mars, ish-presidenti i Kosovës, Hashim Thaçi, dhe ish-kryeparlamentari, Kadri Veseli, nuk kanë pranuar të takohen me ministren, Albulena Haxhiu, gjatë vizitës së saj në Hagë, e ka konfirmuar edhe Ministria e Drejtësisë.

“Hashim Thaçi dhe Kadri Veseli nuk na kanë pranuar. Me aq sa e dimë ne, ata kanë refuzuar një kërkesë tonën, por vullneti i ministres është akoma që të takojë të gjithë të burgosurit”, ka thënë Flamur Pireva, zëdhënës i Ministrisë së Drejtësisë, në një përgjigje të shkurtër për Albanian Post.

Ministrja Haxhiu ka të kaluar me plotë përplasje si me Thacin ashtu edhe me Veselin.

Madje, me ish-kryeparlamentarin kishte pasur një përplasje tejet të ashpër.

Ajo, në momente eskalimi, në një nga seancat sa Vetëvendosje ishte akoma në opozitë, e kishte quajtur Veselin “kriminel”.

Ishte edhe tashmë kryeministri i Kosovës, Albin Kurti, që shumë shpesh kishte akuzuar Thaçin e Veselin.

Madje, Kurti kishte dalë një herë edhe me një shkrim të gjatë, të titulluar “shko Hashim”, ku argumentonte se si Thaçi duhet të pranojë të shkojë të gjykohet nga Gjykata Speciale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.