Irani, Venezuela dhe 6 anëtarë të tjerë të OKB-së humbasin të drejtën e votës

Sipas dokumenteve që janë zbuluar të mërkurë, tetë vende anëtare të Organizatës së Kombeve të Bashkuara, duke përfshirë edhe Iranin e Venezuelën, kanë humbur të drejtat e tyre të votës për shkak të detyrimeve të papaguara.

Sekretari i Përgjithshëm, Antonio Guterres, në një letër të 11 tetorit, identifikoi 11 vende që nuk i kishin përmbushur detyrimet e rregulluara sipas kartës së OKB-së, duke përfshirë shtetet: Antigua dhe Barbados, Komoret, Republikën e Kongos, Guinenë, Iranin, Papua Guinenë e Re, Sao Tome dhe Principe, Sudan, Vanuatu dhe Venezuelën.

Karta e OKB-së përcakton se anëtarët, që kanë borxhe të barabarta ose më të mëdha se detyrimet në dy vitet e mëparshme, do të humbasin të drejtën e votës. Ajo lejon Asamblenë e Përgjithshme që “një anëtar të votojë nëse është i kënaqur që mospagesa të bëhet për shkak të kushteve jashtë kontrollit të anëtarit”.

Përjashtime të tilla u bënë për kombet afrikane të Komoros, Sao Tome dhe Principe dhe Somalinë deri në fund të sesionit aktual të 76-të të asamblesë.

Megjithatë, Irani përballet me një pagesë minimale prej më shumë se 18 milionë dollarë për të rikthyer të drejtat e tij të votës, ndërsa Venezuela përballet me një shumë të madhe prej gati 40 milionë dollarësh.

Ndërkohë, Sudani i goditur nga trazirat duhet të bëjë një pagesë minimale prej afro 300 mijë dollarë.

Pezullimet e tyre hyjnë në fuqi menjëherë.

Ky është viti i dytë me radhë që Irani humbet të drejtën e votës për detyrimet e papaguara.

Këto të drejta u rivendosën në korrik, kur Irani bëri pagesën dhe sulmoi fuqishëm sanksionet e vazhdueshme të Shteteve të Bashkuara që kanë dëmtuar ekonominë e tij.