![](https://albanianpost.com/wp-content/uploads/2024/06/investment.jpg)
Investimet shqiptare jashtë vendit kanë shënuar nivele të larta në tremujorin e parë të vitit 2024.
Sipas të dhënave nga Banka e Shqipërisë, vlera e investimeve të kompanive shqiptare jashtë vendit arriti në 52 milion euro, një milion euro më shumë krahasuar me të njëjtën periudhë të një viti më parë. Kjo është vlera më e lartë e investimeve shqiptare jashtë vendit për tremujorin e parë të vitit, që prej vitit 2008.
Në pjesën më të madhe, investimet shqiptare janë kanalizuar në kontribute të drejtpërdrejta në kapitalin e shoqërive të kontrolluara jashtë vendit.
Këto injektime kapitali përbënin më shumë se 69% të fluksit të ri të investimeve shqiptare jashtë vendit. Pjesa tjetër konsiston kryesisht në fitime të riinvestuara të kompanive me aktivitet jashtë vendit.
Në vitet e fundit, investimet e huaja direkte në Shqipëri këtë vit po shënojnë vlera rekord, por, nga ana tjetër, një tendencë të ngjashme shfaqin edhe investimet shqiptare jashtë vendit.
Sidoqoftë, bilanci neto i investimeve të huaja direkte për 3-mujorin I 2024 ishte negativ, për një vlerë të përgjithshme prej 302 milionë eurosh, në rritje me 18% krahasuar me të njëjtën periudhë të vitit të kaluar.
Bilanci negativ në llogarinë e investimeve të huaja nënkupton se investimet e huaja direkte hyrëse në Shqipëri ngelen shumë më të larta krahasuar me investimet shqiptare jashtë vendit.
Të dhënat statistikore për investimet e sipërmarrjeve shqiptare jashtë vendit nuk detajohen për shpërndarjen e tyre gjeografike apo sektoriale.
Për këtë arsye, ende nuk ekziston një “hartë” e mirëfilltë e investimeve shqiptare jashtë, apo në cilat prej vendeve apo sektorëve po përqendrohet rritja në vitet e fundit.
Megjithatë, është fakt se disa prej grupeve më të rëndësishme shqiptare të biznesit prej vitesh janë të vendosura jashtë vendit. Në vitet e fundit, kjo prani duket se po zgjerohet, edhe si pjesë strategjisë së diversifikimit të biznesit.
Disa prej grupeve të rëndësishme të biznesit në vend kanë vendosur një prani në Kosovë, Maqedoninë e Veriut, Kroaci, Austri, Zvicër, Kroaci apo SHBA, me aktivitet kryesisht në sektorin e pasurive të paluajtshme dhe në shërbimet financiare.
Të dhënat e Bankës Qendrore të Kosovës japin një informacion për investimet shqiptare në Kosovë, që vlerësohet se është shteti me përqendrimin më të madh të investimeve tona jashtë.
Shifrat e BQK-së tregojnë se deri në fund të vitit 2023, stoku i investimeve shqiptare në Kosovë kishte vlerën e 371 milionë eurove.
Me këtë shifër, Shqipëria është deri tani investitori i gjashtë më i madh në Kosovë.
Ndërkohë, flukset e reja të investimeve shqiptare në Kosovë për 3-mujorin e parë të këtij viti kishin vlerën e 21.7 milionë eurove, në rritje me 29% krahasuar me të njëjtën periudhë të vitit të kaluar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Sa të ardhura pati dhe shpenzoi Shqipëria në pesë muajt e parë 2024?
-
“Rritja e bruto-produktit vendor”, Kurti “mjeshtër i propagandës”
-
FMN: Ruajtja e pavarësisë së BSH thelbësore për ruajtjen e stabilitetit financiar
-
Moska humb luftën e gazit, kolapsi i shitjeve të Gazprom do 10 vite për tu rikuperuar
Lajmet kryesore
-
Shqipëria kërkon ‘kokën’ e Kroacisë për të besuar në kualifikimin e mëtejshëm në Euro 2024
-
Begaj pritet në Berlin nga Steinmeier: Mora garanci për integrimin në BE
-
Zgjedhjet franceze, sondazhet tregojnë djathtas: Centristët nuk kualifikohen në raundin e dytë
-
Bislimi thotë se ia ka vlejtur Kosova t’i humbë edhe 1.5 miliardë euro nga sanksionet e BE-së, sepse “nuk kemi lëshuar pe”