Investimet e Huaja Direkte kapën vlerën e 9 miliardë eurove në Shqipëri

Në vitin 2021, Investimet e Huaja Direkte kapën vlerën e 9.53 miliardë eurove në Shqipëri.

Rritja vjetore ishte 12.5 për qind më shumë stok se viti 2020.

Këto janë të dhënat e fundit që zbulon Open Data Albania, duke iu referuar shifrave zyrtare të Bankës së Shqipërisë.

Stokun më të lartë në Shqipëri vijojnë ta mbajnë Zvicra, Holanda, Kanadaja, Italia dhe Turqia.

Renditja e vendeve “Origjinë e Investimeve” mbetet e njëjtë: Zvicra me 18.3 për qind, Holanda me 16.2 për qind, Kanadaja 12.5 për qind dhe Italia me 10.5 për qind të totalit.

Greqia ka shënuar vlerën më të lartë të investimeve të tërhequra duke ulur stokun e IDD-ve (Investimet Direkte nga Diaspora) në Shqipëri me 203.7 milionë euro.

Bullgaria, Holanda dhe Italia kanë rritje në vlerë IHD kundrejt vitit të mëparshëm.

Stoku i IHD-ve nga vendet fqinje me Shqipërinë në vitin 2021 rezulton 257 milionë euro nga Greqia, 139 milionë euro nga Kosova, 62 milionë euro nga Maqedonia e Veriut dhe 2.7 milionë euro nga Mali i Zi.

Investimet e huaja

Holanda kryesonte listën në gjashtëmujorin e parë të vitit 2021, si investitori më i madh i huaj në vend me 104 milionë euro deri në fund të qershorit.

Pavarësisht faktit se vlera e prurjeve nga ky shtet holandez shënoi një rënie të konsiderueshme këtë periudhë.

Pas saj, investitori i dytë më i madh ishte Italia, me një hyrje totale prej 61 milionë eurosh, e ndjekur nga Turqia dhe Franca, respektivisht me 48 dhe 47 milionë euro hyrje nga investimet e huaja direkte nga këto vende.

Ndërkohë, investimet zvicerane panë një tkurrje të fortë, duke rënë në 28 milionë euro, nga 117 milionë euro të arritura në të njëjtën periudhë të një viti më parë.

Viti 2020

Sipas raportit të bilancit të pagesave të publikuara nga Banka e Shqipërisë, për vitin 2020 investimet e huaja direkte në Shqipëri kanë qenë 933 milionë euro.

“Kryesisht investimet në Shqipëri vijnë nga vendet fqinje, si Italia dhe Greqia. Këto vende kanë treguar një interes në zhvillimin ekonomik të vendit”, është shprehur për Albanian Post politologu Shpend Gashi.

Më tej, ai ka thënë se vitet e fundit, qeveria shqiptare u ka hapur rrugë edhe investimeve të vendeve të lindjes, të cilat janë shoqëruar me rritjen e flukseve të kapitalit në këto vende.

Investimet italiane, ka shpjeguar ai, janë të përqendruara në rajonin Perëndimor të Shqipërisë, në afërsi të detit Adriatik, ndërsa ato greke më shumë në jug, në sektorë të lehtë të ekonomisë.

Një veçori e investimeve italiane, ka përmbyllur Gashi, është se ato gjenden kudo, si në industri të vogla, edhe tek ato të rënda.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.