Intervistimi i Mihalit, Selmanaj: Mos u befasoni kur të ftohet edhe Kurti në Prokurorinë Speciale

Deputeti i Lidhjes Demokratike të Kosovës (LDK), Driton Selmanaj, ka reaguar pas intervistimit të Dejona Mihalit nga Prokuroria Speciale, duke thënë se Mihali është njëra nga “mashat” e kryeministrit Albin Kurti, “për korrupsionin masiv tek 1 mijë kontratat sekrete tek të gjitha ministritë, duke përfshirë edhe KEK-un”.

Nëpërmjet një postimi në platformën sociale në Facebook, ai ka thënë se “mos u befasoni kur të ftohet për intervistim edhe Albini në Prokurorinë Speciale, sepse jam i bindur që zhvillimi i hetimeve detyrimisht do ta implikojnë edhe atë”.

Ai ka potencuar se me kohë e ka thënë që “krimi dhe korrupsioni në qeverisjen e Lëvizjes Vetëvendosje është i strukturuar”.

“Nuk vidhet dhe nuk abuzohet”, thekson ai, “me paranë publike pa dijeninë e Albin Kurtit”.

Albanian Post të premten raportoi se Koordinatorja e Komiteteve në Lëvizjen Vetëvendosje – partia në pushtet – Dejona Mihali po intervistohet në lidhje me rastin për dyshimet për korrupsion në Korporatën Energjetike të Kosovës, apo siç njihet rasti i Nagip Krasniqit.

Siç ka kuptuar AP ftesa për intervistim Mihalit i është bërë për të premten e kaluar, por ajo nuk ishte përgjigjur pozitivisht deri për këtë të premte.

Mediumi gjithashtu ka kuptuar se arsye e thirrjes së Mihalit është gjetja e provave për të gjatë hetimit të Krasniqit.

“Janë disa mesazhe mes Mihalit dhe Nagip Krasniqit që e involvojnë atë”, ka thënë një burim brenda Prokurorisë Speciale.

Prokuroria e akuzon Krasniqin për shkelje të detyrës gjatë një periudhe më pak se dyvjeçare.

Pas më shumë se 3 orë intervistim, Dejona Mihali, Koordinatorja e Komiteteve në Lëvizjen Vetëvendosje – partia në pushtet – është parë teksa largohet nga ndërtesa e Prokurorisë Speciale të Kosovës.

Në një prononcim të shkurtër për media, Mihali ka potencuar se ka pranuar ftesën e Prokurorisë Speciale me qëllim “për të ndihmuar prokurorin për zbardhjen e së vërtetës”.

Kur u pyet se për të cilën të vërtetë e ka fjalën, Mihali sugjerojë që të pyetet prokuroria.

E njëjta nuk ka pranuar që t’iu përgjigjet më tej pyetjeve të gazetarëve.

Prokuroria Speciale e Kosovës, nëpërmjet një komunikate për media, konfirmoi se Mihali, po intervistohet të premten me ftesë të kësaj prokurorie.

Sipas Prokurorisë Mihali po intervistohet në “cilësinë e dëshmitares për disa çështje penale”, të cilat kjo prokurori i ka në hetim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.