Inter-i i ka vënë sytë te Guglielmo Vicario, portieri aktual i Tottenham-it, si opsioni kryesor për të përforcuar portën për sezonet e ardhshme, raportojnë mediat sporitve italiane.
Duke pasur parasysh nevojën për të gjetur një zëvendësues afatgjatë për Yann Sommer-in, i cili është në fazën e fundit të karrierës së tij dhe është vendosur si titullar që kur mbërriti për të zënë vendin e Samir Handanovic, ekipi zikaltër e ka identifikuar portierin italian si idealin për të marrë përsipër rolin nga zviceranit.
Inter-i kërkon të sigurojë një portier që mund të zhvillohet dhe Vicario, me eksperiencën e tij në Premier League, duket se është basti më i fortë.
Vicario, 27 vjeç, mbërriti te Tottenham në verën e vitit 2023 nga Empoli, në një operacion me vlerë afër 20 milionë euro.
Që nga ardhja e tij në Angli, portieri italian ka treguar performancë solide mes shtyllave, duke u bërë një pjesë kyçe për skemën e Ange Postecoglou.
Edhe pse është përballur me kritika të herëpashershme, paraqitjet e tij në përgjithësi kanë qenë pozitive, gjë që ka ngjallur interesimin e disa skuadrave evropiane, veçanërisht Inter-it, të cilët po e ndjekin me vëmendje ecurinë e tij.
Me Sommer-in që po i afrohet të 36-ave, zyrtarët e Inter-it janë të bindur se është koha e duhur për të menduar për një pasardhës.
Edhe pse Vicario ka kontratë me Tottenham-in deri në vitin 2027, Inter-i do të ishte i gatshëm të negocionte një transferim për rreth 30 milionë euro. Megjithatë, sfida qëndron në bindjen e ekipit anglez, pasi presidenti Daniel Levy njihet për qëndrimet e tij të ashpra në negociata dhe mund të kërkojë një shifër më të lartë.
Nëse nënshkrimi përfundon, Vicario do të kthehej në vendlindjen e tij dhe do të forconte një nga klubet më të rëndësishme në Serie A, duke hedhur një hap vendimtar në karrierën e tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
