Instituti i Statistikave në Shqipëri (INSTAT) ka publikuar raportin për tremujorin e parë të vitit 2021 mbi shfrytëzimin e kapaciteteve të strukturave akomoduese, ku më së shumti në sy bie një rritje e numrit të vizitorëve, por një ulje e netëve të qëndrimit.
Në tërësi, krahasuar me tremujorin e parë të 2021-shit, numri i vizitorëve është rritur me 6.3% krahasuar me të njëjtën periudhë të vitit 2020.
Konkretisht në numra, ka një rritje me mbi 6 mijë vizitorë rezidentë dhe rreth 1 mijë jo rezidentë në dy periudhat kohore.
Zonat jo bregdetare kanë qenë ato më të vizituarat. Kjo, edhe për qytetarët rezidentë, edhe për ata jo rezidentë.
Nëse do të bëhej një ndarje, rritja e vizitorëve rezidentë është shumë më e lartë se sa ajo e jo rezidentëve. Me 10.1% është rritur fluksi për të parët, ndërsa me 1.8% për të dytët.
Netët e qëndrimit, nga ana tjetër, janë ulur me 7% në krahasim me 2020-ën. Për rezidentët, ulja është më e lartë, me 16.4% më pak netë qëndrimi se sa e njëjta periudhë në vitin 2020. Për vizitorët e huaj, rënia e netë qëndrimeve është me 7%.
Hotelet janë strukturat kryesore akomoduese. Mbi 110 mijë vizitorë kanë zgjedhur ato për të qëndruar në Shqipëri.
Nëse kryhet zbritja, vihet re se numri mesatar i netë qëndrimeve është dy.
Rajoni më i vizituar është ai i Shqipërisë qendrore, me 52.1% të vizitorëve të akomoduar aty.
Shqiptarët e Kosovës kanë qenë ata që e kanë zgjedhur më së shumti. Mbi 17% e vizitorëve, jo rezident në Shqipëri, janë nga Kosova. Italianët pasojnë me 6.9%. Turqit me 3.5%, gjermanët me 2.3% dhe britanikët me 2.1%.
Norma neto e shfrytëzimit të shtretërve dhe dhomave mbetet nën 10%.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
