Instagram-i paditet për dëmtim të shëndetit mendor të të rinjve

Kompania Meta është akuzuar se ka mashtruar publikun në lidhje me rreziqet e përdorimit të mediave sociale.

Dhe se me këtë, ka kontribuar në një krizë të shëndetit mendor tek të rinjtë.

Pretendimet u bënë në një padi federale, e cila u njoftua nga dhjetëra shtete amerikane.

Sipas tyre, kompania përdori veçori të varësisë për të “çuar në grackë” përdoruesit, duke fshehur rreziqet thelbësore të platformave të saj.

Por Meta ka deklaruar se mbetet “e zhgënjyer”.

Në padi thuhej se Meta kishte thyer ligjet për mbrojtjen e konsumatorëve duke u përfshirë në sjellje mashtruese.

Dhe se kompania mblodhi të dhëna për fëmijët nën moshën 13 vjeç, duke shkelur detyrimet sipas Ligjit për Mbrojtjen e Privatësisë në internet të Fëmijëve.

“Kompanitë e mediave sociale, përfshirë Meta, kanë kontribuar në një krizë kombëtare të shëndetit mendor të të rinjve dhe ata duhet të mbajnë përgjegjësi”, ka thënë Prokurorja e Përgjithshme e New York-ut Letitia James, një nga 33 prokurorët e përgjithshëm që nënshkruan padinë.

Nëntë shtete të tjera gjithashtu bënë pretendime të ngjashme në paditë e tyre.

Meta dhe kompanitë e tjera të mediave sociale, tashmë përballen me qindra padi në SHBA të ngritura nga familje, të rinj dhe rrethe shkollore për ndikimin në shëndetin mendor.

Por ky i fundit shënon aksionin më të madh deri më sot.

Ai pason një hetim në praktikat e kompanisë në vitin 2021 nga disa prokurorë të shtetit, pasi një denoncuese, Frances Haugen, dëshmoi në SHBA se kompania e dinte që produktet e saj mund të dëmtonin fëmijët.

Shtetet po kërkojnë dëme financiare dhe ndalimin e praktikave të dëmshme.

Një pjesë e madhe e padisë janë redaktuar nga publiku. Por në mënyrë specifike emërton veçori të tilla si pëlqimet, sinjalizimet dhe filtrat që thotë se janë “të njohura për të nxitur dismorfinë trupore të përdoruesve të rinj”.

Dismorfia e trupit e bën një person të kalojë shumë kohë duke u shqetësuar për të metat në pamjen e tij dhe shpesh këto të meta të perceptuara janë të padukshme për të tjerët.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.