Lajme

Indi: Shkatërrohen shtëpitë e myslimanëve në Uttar Pradesh pas protestave


Autoritetet në shtetin verior indian të Uttar Pradesh (UP) kanë shkatërruar shtëpitë e disa myslimanëve, që dyshohet se ishin të lidhur me protestat fetare që u kthyen në dhunë.

Protestat u nxitën nga komentet nënçmuese të bëra nga dy ish-liderë të Partisë qeverisëse Bharatiya Janata (BJP) për profetin Muhammad.

Demonstratat u bënë të dhunshme në disa shtete pasi njerëzit dëmtuan pronat.

Më shumë se 300 persona janë arrestuar në Uttar Pradesh.

Autoritetet lokale rrënuan tre shtëpi në pronësi të myslimanëve gjatë fundjavës, me pretendimin se ato ishin ndërtuar në mënyrë të paligjshme – një pretendim i mohuar nga disa prej pronarëve.

Shkatërrimi shkaktoi dënimin nga liderët e opozitës, të cilët akuzuan qeverinë e shtetit – të kryesuar nga shefi i ministrit Yogi Adityanath – për shënjestrimin e komunitetit pakicë mysliman.

Kritikët thonë se polarizimi fetar është thelluar në Indi që nga viti 2014, kur nacionalisti hindu Janata erdhi në pushtet. Gjuha e urrejtjes dhe sulmet kundër myslimanëve janë rritur ndjeshëm gjatë viteve të fundit.

Një postim në median sociale Twitter nga Mrityunjay Kumar, këshilltari i Adityanath për mediat, shkaktoi gjithashtu zemërim. Ai kishte postuar në Twitter një foto të një buldozeri duke prishur një ndërtesë, duke shtuar: “Elementët e padisiplinuar mbani mend, çdo të premte pasohet nga një e shtunë”.

Dy nga shtëpitë e shkatërruara i përkisnin personave që u akuzuan për gjuajtje me gurë pas namazit të xhumasë.

E treta ishte ajo e një politikani të quajtur Javed Ahmed, i cili është akuzuar për planifikimin e protestave. Vajza e tij, Afreen Fatima, është një aktiviste e shquar e të drejtave myslimane, e cila kishte marrë pjesë në protestat kundër një ligji të diskutueshëm të shtetësisë.

Një ish-kryetar i gjykatës së lartë të Allahabadit i tha gazetës “Indian Express” se prishja e shtëpisë së Ahmed ishte “krejtësisht e paligjshme”.

Një zyrtar nga Autoriteti i Zhvillimit të Prayagraj (PDA) – i cili shkatërroi shtëpinë e Ahmed – ka thënë se i kishte lëshuar një njoftim në maj, duke i kërkuar që të paraqitej para tyre. Por, Fatima e ka mohuar këtë, duke thënë se familja u informua vetëm kur një njoftim ishte mbërthyer në derën e tyre të shtunën.

Një grup avokatësh i shkroi edhe gjykatës së lartë, duke theksuar se prishja ishte në kundërshtim me ligjin.

Kjo nuk është hera e parë që Uttar Pradesh dhe disa shtete të tjera të udhëhequra nga Janata akuzohen për përdorimin e prishjeve për të synuar protestuesit e supozuar si pasojë e dhunës në komunitet. Ekspertët kanë vënë në dyshim sanksionin ligjor të metodës.

/Albanianpost.com


Lajmet kryesore