Incidenti me Osmanin, Koalicioni VLEN: Shteti s’ka kompetencë mbi sigurinë e aeroportit

Koalicioni “VLEN” në Maqedoninë e Veriut nëpërmjet një komunikate për media ka reaguar pas incidentit me presidenten e Kosovës, Vjosa Osmanit, në Aeroportin Ndërkombëtar të Shkupit, duke potencuar se Ministria e Punëve të Brendshme nuk ka kompetencë mbi sigurinë e aeroportit.

Sipas Konventës së Vjenës, udhëheqësit shtetërorë kanë trajtim të veçantë gjatë udhëtimit, megjithatë sipas VLEN-it, detajet e protokolleve të sigurisë i përcakton koncesionari i aeroportit.

Koalicioni VLEN ndër të tjera është shprehur i shqetësuar me qasjen e Bashkimit Demokratik për Integrim – parti e udhëhequr nga Ali Ahmeti – në raport me incidentin në Aeroportin Ndërkombëtar të Shkupit.

“Si VLEN, shprehim shqetësimin tonë se si një parti politike në Maqedoninë e Veriut, konkretisht BDI, po përdor gënjeshtra dhe manipulime në përpjekje për të dëmtuar vetëm VLEN-in, pa u shqetësuar për pasojat që mund t’i sjellë Kosovës. Ne i bëjmë thirrje opinionit që të ndjekë faktet dhe jo propagandën e BDI-së”.

VLEN ka kërkuar që BDI të ndalojë përhapjen e “manipulimeve dhe të ndalojë dëmtimin e marrëdhënieve midis Kosovës dhe Maqedonisë së Veriut”.

Bekim Kupina, Këshilltar për Media i Presidentes së Kosovës, Vjosa Osmani, ka thënë se në aeroportin e Shkupit, presidentes, sigurimi i aeroportit ka tentuar që t’ia marrë telefonin personal, gjë që është refuzuar nga Osmani, e cila më pastaj ka hasur në rezistencë nga pala maqedonase.

Ai ka theksuar se përkundër shpjegimit të rregullave qe ekipi i presidentes ia ka bërë të ditur zyrtarit të aeroportit, “sigurimi ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën”.

Mediat në Maqedoni: Incident me Vjosa Osmanin në aeroportin e Shkupit, refuzoi ta hap valixhen – u nxorën edhe armët

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.