Imane Khelif fiton medaljen e artë olimpike

Me një vendim unanim, boksierja Imane Khelif nga Algjeria fitoi medaljen e artë në Paris.

Khelif ka luftuar si brenda dhe jashtë ringut, pasi një organizatë boksi vuri në pikëpyetje kualifikimin e saj për të garuar në grupin e femrave, pavarësisht faktit se ajo e ka bërë këtë për vite, duke përfshirë Olimpiadën e Tokios, ku përfundoi e pesta.

Me fitoren e saj në Paris, Khelif tha se “unë u dërgova atyre një mesazh të vetëm me këtë medalje të artë dhe them se dinjiteti dhe nderi im është mbi gjithçka”.

Përplasja e Khelif përfundoi në 11 minuta, por nuk ishte aq e rëndësishme aftësia që ajo tregoi në ring apo grushtet kritike që goditi kundër kundërshtares së saj, Yang Liu nga Kina.

Ishte më shumë se kaq.

Ishte më shumë se kaq për Khelif, e cila, me nënën e saj, shiste hekurishte dhe kuskus në fshatin e tyre rural në Algjerinë perëndimore.

Kjo për të mbledhur paratë që i duheshin për biletën e autobusit në një fshat tjetër 10 km larg për t’u stërvitur me një trajner.

“Unë jam nga një fshat shumë i vogël dhe një familje shumë e varfër në Algjeri”, tha ajo.

“Kam lindur dhe jam rritur në lagje të varfra, por familja ime ishte gjithmonë krenare për mua”.

Ishte më shumë se kaq për familjen e saj, e cila nga shtëpia shqetësohej për sigurinë e saj që kur Khelif u bë cak i akuzave të pabaza nëse ajo është apo jo grua; duke rezultuar në një stuhi mendimesh dhe spekulimesh që ajo në fund i quajti ngacmim.

Dhe ishte më shumë se kaq për mijëra gra që mbushnin një fushë të Roland Garros ku u mbajt ndeshja, për të cilat Khelif është kthyer më shumë se në një atlet.

Ajo është bërë një simbol i fuqizimit për gratë.

“Ajo është një model për gratë. Ajo është denigruar dhe kjo është arsyeja pse është e rëndësishme ta mbështesim”, thotë Sabrina Djemoui, një algjeriane që jeton në Paris dhe solli djalin e saj në ndeshje.

“Algjerianët kanë ardhur në grupe për ta mbështetur atë dhe gjatë gjysmëfinales së saj mund të dëgjoni thirrjet ‘Imane, Imane, Imane’. Ajo përfaqëson Algjerinë dhe sportin e grave”.

Ato këngë mbushën sërish Roland Garros gjatë ndeshjes së Khelif për medaljen e artë.

Në sekondat e fundit të raundit të tretë, Khelif, duke e ndjerë se ishte me më shumë goditje se Yang, filloi të kërcente.

Pasi u shpall fituese e medaljes së artë, Khelif hyri në xhiron e saj tashmë të njohur në mes të ringut, duke pompuar këmbët e saj lart e poshtë.

“Është një kërcim i bërë nga miku dhe mbështetësi im – ai është një futbollist në Algjeri”, tha ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.