Për zëvendëskryeministrin Besnik Bislimi, Kosova është një vend që nuk ka probleme, është duke lulëzuar, ka nevojë shumë për punëtorë, madje ata duhet importuar, sepse rritje ekonomike më të madhe se kurrë më parë.

Por, krejt këto konstatime, sipas ekspertëve të ekonomisë, janë vetëm “iluzione propagandistike”.

Sipas të prononcuareve të Albanian Post, antonimet e atyre që Bislimi përpiqet t’i prezantojë me një cektësi të theksuar janë realiteti që ballafaqohen çdo ditë qytetarët e Kosovës, assesi e kundërta.

Gjatë raportimit në Komisionin Parlamentar për Integrime Evropiane, Bislimi tha se Kosova është një vend që ofron aq shumë punë, saqë për të plotësuar nevojat duhet të importohen punëtorë nga jashtë, sepse vendorët nuk i mbulojmë dot të gjitha vendet e ofruara.

“Ka aq shumë shumë shumë… punë”, përsëriste zëvendës-kryeministri fjalën “shumë”, gjatë fjalimit të tij në Komisionin Parlamentar duke provuar ta bëjë disi më të vërtetë konstatimin e tij të pavërtetë.

Kjo deklaratë e Bislimit u bë vetëm një muaj pasi që doli raporti nga Agjencia e Bashkimit Evropian për Azilin (EUAA), ku u rikonfirmua se Kosova, bashkë me Shqipërinë, “për tre muajt e parë të vitit 2024 kanë kryesuar në listën e aplikuesve nga Ballkani Perëndimor që kanë kërkuar azil për në një vend të BE”.

Gjithashtu, sipas Agjencisë së Statistikave të Kosovës (ASK) punësimi nga vitit 2021 deri në vitin 2023 fuqia punëtore aktive është zvogëluar 21 mijë e 571 persona.

Prandaj, për ish-kryetarin e Odës Ekonomike të Kosovës (OEK), Berat Rukiqi, Kosova po sheh vetëm lulëzim të izolimit, keqqeverisjes dhe migrimit.

“Deklaratat e Bsilimit, përveç që janë gënjeshtra pa kripë, janë të nivelit sharlatanesk, gjë që e karakterizon Bislimin në çdo temë që e mbulon”, thotë Rukiqi në një prononcim për Albanian Post.

Fatkeqësia më e madhe në të gjithë këtë situatë, sipas anëtarit të kryesisë së Lidhjes Demokratike të Kosovës (LDK), është që ky person e mban hiç më pak se pozitën e zëvendëskryeministrit.

“Kosovës i ikin mesatarisht mbi 170 persona në ditë. Kjo ka shkaktuar çrregullime të mëdha në tregun e punës, rrjedhimisht mungesë të shumë kuadrove”, argumenton ai.

Në këtë linjë është edhe eksperti i çështjeve ekonomike, Arben Mustafa, koordinator për Financa në kuadër të Kabinetit për Qeverisje të Mirë të Partisë Demokratike të Kosovës (PDK).

Derisa prezanton të dhënat për gjendjen reale ekonomike, konstatimet iluzionare të Bislimit i konsideron tejet joserioze dhe të papërgjegjshme.

Në një bisedë për AP, Mustafa potencon se ekonomia e Kosovës gjatë viteve të fundit, posaçërisht gjatë qeverisjes së Kurtit, “po kalon nëpër periudhën më të zymtë që nga çlirimi i vendit”.

“Norma e rritjes ekonomike prej vetëm 3.3% është më e ulëta në më shumë se dhjetë vite, deficiti tregtar ka arritur në mbi 50 për qind të Bruto-produktit Vendor që paraqet nivelin më të lartë ndonjëherë, përderisa rritja e çmimeve ka ulur më masë të madhe fuqinë blerëse të çdo qytetari”, shpjegon ai.

Përveç kësaj, ai thekson se investimet e sektorit privat kanë shënuar rënie të vazhdueshme, ndërsa investimet e huaja, edhe ato pak që janë, po koncentrohen kryesisht në sektorin e patundshmërisë.

“Në vend të deklaratave propagandistike, zëvendëskryeministri do të duhej ta paraqiste një raport real dhe serioz mbi gjendjen e ekonomisë”, vlerëson ai. “Kjo do të ishte më e pakta që pritet nga një zëvendëskryeministër që me profesion është ekonomist”, insiston.

Mirëpo, ai mendon se dështimet e thella në çdo fushë “si duket udhëheqësve të qeverisë ua kanë lënë propagandën dhe keqinformimin si instrumentin kryesor të komunikimit me publikun”.

Ndryshe, opozita, por edhe njohësit e çështjeve ekonomike, vazhdimisht kanë kritikuar qeverinë e drejtuar nga Albin Kurti për politikat ekonomike, posaçërisht për mungesën e investimeve kapitale.

Nga ana tjetër, një numër i konsiderueshëm i të rinjve janë duke u larguar nga Kosova për në vendet perëndimore, për të kërkuar kështu një mirëqenie më të mirë.