Autoritetet amerikane kanë identifikuar Anthony Quinn Warner si autor të shpërthimit që ndodhi në Nashville mëngjesin e Krishtlindjes, pas përputhjes së ADN-së së mbetjeve që u gjetën në vendin e ngjarjes.
Përfaqësuesi ligjor i “Middle Disctrict of Tennessee”, Don Cochran, tha se “Warner ishte brenda mjetit tip rulot kur shpërthimi ndodhi”.
Në gjurmët që u gjetën në skenën e krimit, pati dhe mbetje njerëzore. Nga analizat e bëra nga mjekësia ligjore, u përcaktua se ato përputheshin me ADN-në e Warner.
Autori 63 vjeçar jetonte pranë zonës ku ndodhi shpërthimi. Ai ishte identifikuar nga policia si autor i mundshëm edhe përpara përputhjes së ADN-së. Ruloti në të cilin ishte vendosur bomba ishte i regjistruar në emrin e tij.
Shpërthimi i fuqishëm u kap nga kamerat e sigurisë të policisë së Nashville-it. Nga shpërthimi u plagosën tre persona si dhe u dëmtuan mbi 40 ndërtesa. Ndër to edhe godina e zyrave të gjigandit të telefonisë AT&T.
This is video of Friday morning's explosion recorded by an MNPD camera at 2nd Ave N & Commerce St. pic.twitter.com/3vaXhoUOAR
— Metro Nashville PD (@MNPDNashville) December 28, 2020
Për shkak të shpërthimit, rrjeti wireless i kompanisë ra dhe përdoruesit e AT&T-së në Nashville mbetën pa shërbim.
Nuk mendohet se persona të tjerë kanë qenë të përfshirë në ngjarje. Ndërkohë komshinjtë e përshkruajnë Warner-in si një njeri të vetmuar.
Ende nuk është bërë e qartë arsyeja që ka shtyrë Warner të kryejë aktin. Hipotezat e para janë hedhur se ai mund ta ketë kryer aktin për shkak të konspiracioneve mbi rrjetin 5G.
Ruloti ka qenë i parkuar shumë pranë zyrave të AT&T, por nuk dihet nëse është vendosur qëllimisht aty.
Ndërkohë agjenti special i FBI-së, Douglas Korneski, ka anashkaluar çdo koment nëse akti mund të cilësohej terrorizëm i brendshëm./AlbanianPost.com
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com