Ibrahimaj: Reforma e menaxhimit të financave publike, instrument për përshpejtimin e integrimit në BE

“Ministria e Financave dhe Ekonomisë ka si qëllim mbështetjen e vazhdueshme për njësitë publike në forcimin e sistemit të kontrollit të brendshëm, si dhe përmirësimin e raportimit financiar të sektorit publik, si pjesë e reformave të ndërmarra për mirëmenaxhimin e financave publike”.

Kështu është shprehur ministrja e Financave dhe Ekonomisë, Delina Ibrahimaj, mesditën e 25 janarit gjatë konferencës kombëtare të “Sistemit të kontrollit të brendshëm si një nga shtyllat kryesore në mirëmenaxhimin e financave publike”.

Kjo konferencë u organizua nga MFE-ja, në bashkëpunim me Projektin e Financave Lokale dhe mbështetjen e qeverisë zvicerane.

“Përmes përmirësimeve të vazhdueshme të kuadrit ligjor, në përputhje me praktikat më të mira ndërkombëtare, është bërë i mundur lehtësimi i zbatimit të procedurave në fushën e kontrollit të brendshëm”, tha ministrja në fjalën e saj.

Ajo më tej theksoi se janë kryer një sërë trajnimesh me qëllim rritjen e kapaciteteve të njësive publike, si ato në nivel qendror, ashtu edhe në nivel lokal.

Ndërsa, sipas saj, është ofruar asistentë teknike në ato institucione, të cilat kanë shprehur interes për zbatimin e kërkesave të kontrollit të brendshëm, duke shërbyer si shembuj më të mirë për të implementuar dhe zbatuar më tej këtë reformë.

“MFE harton çdo vit Raportin Vjetor mbi funksionimin e sistemit të kontrollit të brendshëm financiar publik në njësitë e qeverisjes së përgjithshme, i cili, përveç analizave, del me rekomandime për arritjen e objektivave në këtë fushë”, vijoi Ibrahimaj.

Duke vlerësuar punën e bërë deri më tani, Ibrahimaj theksoi se situata aktuale parashtron një agjendë mjaft ambicioze të reformave për të gjitha institucionet në nivel qendror, ndërkohë që gjatë vitit 2022 do të ketë një fokus të shtuar në institucionet e nivelit lokal.

Sipas saj, për të arritur progres, duhet që vullneti dhe angazhimi i qëndrueshëm për reformat të jetë maksimal, me qëllim që kontrolli i brendshëm të jetë sa më efikas dhe sa më efektiv.

“Është me rëndësi kapaciteti i duhur i burimeve njerëzore dhe financiare, ku ne do të vazhdojmë të kryejmë trajnime në të gjitha nivelet e institucioneve, si dhe bashkëpunimi dhe koordinimi mes organizatave dhe institucioneve publike”, u shpreh Ibrahimaj.

Ndër të tjera, ajo vuri në dukje faktin se zbatimi me rigorozitet i reformës në menaxhimin e financave publike është një kusht për rrugën drejt Bashkimit Evropian.

“Konkretisht prioritizimi i masave në fushën e kontrollit të brendshëm, si pjesë e një prej kapitujve themelorë të Acquis – Kapitulli 32 ‘Kontrolli Financiar’ – do të shërbejë si një instrument për përshpejtimin e negociatave të pranimit në BE, si një proces thelbësor për zhvillimin e mëtejshëm të vendit tonë”, e përmbylli ministrja fjalën e saj.

I pranishëm në këtë konferencë ishte dhe kryetari i Bashkisë Tiranë, Erjon Veliaj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.