Kryetari i Federatës së Futbollit të Kosovës, Agim Ademi, ka thënë se FFK-ja e kanë të gatshëm projektin për rritjen e kapacitetit të stadiumit “Fadil Vokrri” në Prishtinë.
Përmes një postimi në faqen e tij në Facebook, Ademi ka thënë se janë duke pritur dritën e gjelbër nga institucionet për t’ia shtuar stadiumit edhe 8 mijë ulëse të tjera.
“Të gatshëm për projektin e rritjes së kapacitetit të stadiumit ‘Fadil Vokrri’ për 8000 ulëse”.
“Presim përgjigjen nga institucionet lokale e qendrore për ta nisur realizimin e këtij projekti të rëndësishëm e të domosdoshëm”, ka shkruar Ademi.
Kujtojmë që në ndeshjet kur luan Kombëtarja e Kosovës, kërkesat janë shumë të mëdha për ta parë nga shkallët e stadiumit ndeshjen.
Megjithatë, kapaciteti prej 13 mijë e 500 ulëse nuk po del i mjaftueshëm për tifozët, ku shumë prej tyre mbesin pa i parë nga afër dardanët.
Pra, nëse vendoset që të bëhet rritja e stadiumit, atëherë “Fadil Vokrri” do të bëhej me 21 mijë e 500 ulëse.