“I ka bashkuar votat me Listën Serbe”, Haradinaj: Për 4 vjet qeverisje, Kurti i ka poshtëruar kategoritë e luftës

Kryetari i Aleancës për Ardhmërinë e Kosovës (AAK), Ramush Haradinaj, ka thënë se në katër vjet pushtet të Albin Kurtit, kategoritë e lirisë vazhdimisht janë poshtëruar nga qeveria.

Këto komente, Haradinaj i ka bërë përmes një postimi në Facebook, ku ka theksuar se Vetëvendosje nuk ka hezituar që për të mos i përfshirë kategoritë e lirisë në pagën minimale, “të bashkojë votat edhe me Listën Serbe”.

“Nëse Kurti pretendon që vartësit e tij ‘ia kanë pirë duhanin tinëz’, atëherë le t’i rrit sot pagat e familjeve të Dëshmorëve e Martirëve, Invalidëve, Veteranëve, Viktimave të dhunës seksuale”, potencoi Haradinaj.

Sipas ish-kryeministrit, për ta bërë këtë, Kurti mundësinë dhe buxhetin e mjaftueshëm e ka.

“Fatkeqësisht, kjo nuk pritet të ndodh, sepse është vet Kurti ai që qëndron pas marrëveshjeve me ‘vendasin’ dhe Listën Serbe”, përfundoi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.