Hyn në fuqi Rregullorja e re Punës së Kuvendit të Kosovës, Kurti e lartëson si arritje të madhe demokratike

Rrregullorja e re punës e Kuvendit të Kosovës hyri në fuqi këtë të marte pas publikimit në Gazetën Zyrtare, njoftoi Kryeministri i Kosovës, Albin Kurti,

Kurti u shpreh i lumtur që rregullorja e re u miratua gjatë qeverisjes së tij, pas, siç u shpreh ai, 10 vite bllokimi të saj.

“Miratimi i Rregullores vjen pas një përpjekje të gjatë të Kuvendit të Kosovës për të rishikuar rregullat e funksionimit të institucionit më të lartë”.

“Procesi i rishikimit të Rregullores kishte filluar në vitin 2012 dhe kishte vazhduar në secilën legjislaturë, me qëllim të adresimit të problemeve të identifikuara që nuk funksiononin, por që pavarësisht nevojës e përpjekjeve, miratimi i saj nuk kishte ndodhur”, shprehet kryeministri.

Arritje, sipas tij, është miratimi i kësaj rregulloreje, e cila për miratim kërkon dy të tretat e votave në kuvend, konsensus ky jo lehtë i arritshëm.

“Kjo ishte një përpjekje pothuajse 10 vjeçare”, thotë kryeministri.

Për të “punuan shumë deputetë, partnerë ndërkombëtarë dhe pjesëtarë të shoqërisë civile për disa legjislatura me radhë”, vazhdon ai.

Përveç kësaj, kryeministri shprehet se kanë qenë dy faktorë kryesorë që kanë penguar përfundimin e këtij procesi.

“Jostabiliteti institucional dhe mungesa e vullnetit politik të subjekteve politike në Kuvend”.

“Kjo situatë për disa vite me radhë është vlerësuar një nga pikat e dobëta të Kuvendit nga raportet e BE-së për vendin dhe në vazhdimësi kërkohej që Kuvendi duhet të lëvizë në këtë drejtim”, thotë ai.

Njoftimin, përveç tjerash, Kurti e konkludon me bindjen se “është përkushtim i yni politik që në Kuvendin e Republikës, publikja të marrë formën e vet më të lartë si parakusht i çdo dimensioni të ushtrimit të demokracisë direkte apo përfaqësuese”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.