![](https://albanianpost.com/wp-content/uploads/2023/03/Fatmir-Humolli.jpg)
Ish-përfaqësuesi i zyrës së Lëvizjes Kombëtare për Çlirimin e Kosovës (LKÇK), Fatmir Humolli, ka konfirmuar për Albanian Post se nga nesër (e mërkurë) s’do të jetë më pjesë e Grupit Parlamentar të Lëvizjes Vetëvendosje.
“Nga nesër nuk do të jem pjesë e grupit parlamentar [të Lëvizjes Vetëvendosje]”, tha Humolli për Albanian Post, ndërsa ka treguar arsyet që e çuan të marrë një vendim të njëjtë me Doarsa Kica-Xhelilin e Haki Abazin, të cilët së fundi janë larguar nga kjo parti.
“Kur kam hyrë në listën e Vetëvendosjes për deputet, kam pasur një marrëveshje me Albin Kurtin dhe Liburn Aliun, duke pasur parasysh problemet që ishin në sektorin e bujqësisë”, tha Humolli.
“Kam pasur prioritet që të ndryshojë këtë duke ndërtuar 1 mijë ferma të lopëve, 1 mijë serra etj. Kam llogaritur që investimet të jenë 400 milion euro dhe shteti të përkrah këtë inciativë, mirëpo ata u tërhoqën nga kjo”, theksoi ai për të vazhduar me arysen e dytë.
“Arsye tjetër është që nuk ka arritur që të i shuaj tensionet në mes të shqiptarëve në Kosovë për t’i unifikuar duke ditur se ka të bëjë me një çështje të rëndësishme siç është ajo me Serbinë”, nënvizoi ai.
Sipas tij, kryeministri Albin Kurti njëjtë ka vepruar edhe me Shqipërinë, duke kërkuar tensione të panevojshme me institucionet e shtetit shqiptar e duke i paragjykuar në kuptimin partiak.
“Këta nuk e kanë parë të rrugës që shteti shqiptar është i domosdoshëm për neve”, tha Humolli për AP.
Sa i përket mundësisë që t’i bashkohet një partie tjetër, ai nënvizoi se nuk ka pikëpamje të njëjta me asnjërën prej partive politike në Kosovë.
“Për momentin nuk kam pikëpamje të ngjashme me partitë e tjera politike në Kosovë, por do të ketë shumë gjëra të përbashkëta që do të na bashkojnë edhe me shumicën, por edhe me pakicën”, theksoi Humolli.
Ndryshe, në 55 ka rënë numri i deputetëve të Grupit Parlamentar të Lëvizjes Vetëvendosje, nga 58 sa i kishte dy vite më parë kur u votua Qeveria Kurti në Kuvendin e Kosovës më 22 mars. Deputetët Doarsa Kica, Haki Abazi dhe Fatmir Humolli, tashmë i kanë ndarë rrugët me partitë në pushtet – Lëvizjen Vetëvendosje dhe Listën Guxo.
Pos tyre, janë edhe dy deputetë “rebelë” – Eman Rrahmani dhe Visar Korenica të cilët i kanë shprehur publikisht qëndrimet e tyre disa herë kundër qeverisë dhe udhëheqjes së partisë nga kryeministri i Kosovës, Albin Kurti, njëherit kryetar i LVV-së.
I fundit që u largua nga Vetëvendosje është deputeti Famir Humolli. Ligjvënësi nga Podujeva shpjegoi të martën e 14 marsit se “pakënaqësitë janë të shumta” dhe se “nuk po shohim ndryshime dhe punë të mëdha të Qeverisë Kurti”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com