Humbjet 3:0 të Kosovës

Sikur të mos të mjaftonte humbja turpëruese nga Rumania 3:0 në Prishtinë, Përfaqësuesja e Kosovës i humbi edhe tre futbollistë krucial për ndeshjen si mysafire ndaj Qipros që do të zhvillohet këtë të hënë në orën 18:00 në kuadër të Ligës së Kombeve.

Federata e Futbollit të Kosovës vendosi t’i suspendojë nga grumbullimi Edon Zhegrovën, Florent Muslijen dhe portierin Arijanet Muric, për siç u tha “thyerje të rregullores disiplinore”.

Por, siç ndodh zakonisht, FFK-ja e cila është e njohur për mungesë të transparencës, nuk dha detaje shtesë për suspendimin e Zhegrovës, Muslijes dhe Muricit, teksa pati raportime se treshja në fjalë janë parë në një klub nate në kryeqytet.

“Për masat e mëtejme ndaj futbollistëve në fjalë, do të vendoset nga Komiteti Ekzekutiv i FFK-së”, thuhej në njoftim të FFK-së.

Ndërkaq një ditë para ndeshjes me Qipron, konferenca për media zgjati më pak se pesë minuta, derisa selektori Franco Foda e kapiteni Amir Rrahmani nuk kanë përmendur fare suspendimin e tre “Dardanëve”.

Në anën tjetër, Edon Zhegrova ka reaguar pasi FFK-ja e largoi nga grumbullimi, duke i cilësuar “lajme të pavërteta” raportimet e mediave rreth asaj se çfarë qëndron prapa vendimit të FFK-së.

“Këto lajme janë të pavërteta dhe pa fakte. Do të flas në fushë së shpejti”, ka shkruar sulmuesi 25-vjeçar në rrjetin “Instagram” të dielën.

Edhe portieri Muric i ka mohuar akuzat rreth “klubeve të natës” teksa e ka e cilësuar “të padrejtë” vendimin e FFK-së, derisa në vend të tij është ftuar portieri FC Dritës, Faton Maloku që ishte në listë të pritjes.

“Mendoj se është vendim egoist i FFK, vijmë këtu të luajmë për shtetin. Ne e kemi një ekip të sigurisë që na ndjek 24/7, por janë ata që i publikojnë këto, për të mbuluar keqmenaxhimin e tyre. Ne shkuam atje për ushqim dhe jo për aheng”, tha ai gjatë një interviste në Klan Kosova.

Por, Zhegrova, që po shkëlqen te skuadra e Lille në Francë, edhe më herët ka pasur përplasje me drejtues të FFK-së dhe me përgjegjësit e Përfaqësueses. Ka dhënë edhe deklarata, prej të cilave është tërhequr më pas.

Ndërsa Muric ishte i suspenduar edhe në të kaluarën nga FFK-ja. Ka pasur raportime se kishte shkuar i dehur në stërvitje.

Kosova synon fitoren e parë ndaj Qipros

Me gjithë problemet, “Dardanët” do të kërkojnë këndelljen pas humbjes 0:3 nga Rumania të premten e kaluar në stadiumin “Fadil Vokrri”.

Në konferencën për media një ditë para ballafaqimit me Qipron, trajneri Franco Foda, theksoi para gazetarëve se “duhet të bëhet çmos që ndeshja të vendoset në favor të Kosovës”.

“Pas humbjes 0:3 kundër Rumanisë, një ditë më pas e kemi analizuar lojën dhe jemi fokusuar për ndeshjen e radhës kundër Qipros. Duhet të bëjmë çmos që t’i marrim tri pikë”, tha Foda.

Foda potencoi se “do të jetë një detyrë e vështirë, por ajo që do të vlejë është që të bëjmë çmos që ndeshjen ta vendosim në favor tonin”.

Edhe kapiteni i Kosovës, Amir Rrahmani, u shpreh se ndaj Qipros, “duhet të hyhet vetëm për fitore”, meqë me tri pikë eventuale, Kosova do të vazhdonte të ishte në garë për vendin e parë në grup.

“Ndeshja e nesërme është e rëndësishme na jep mundësi dhe shpresë për kualifikim. Duhet të hyjmë për fitore, pasi vetëm fitorja na bën punë”, tha mbrojtësi i Napolit.

Ndryshe, Kosova të premten u mposht 3:0 në stadiumin “Fadil Vokrri” nga Rumania në kuadër të Ligës së Kombeve. Pas kësaj humbje, futbollistët u fishkëllyen nga më shumë se 13 mijë shikues prezentë në stadium.

Pas ndeshjes, Foda nuk foli për mediat e interesuara, ndërsa nuk u paraqit as në konferencën zyrtare për shtyp, duke mos marrë përgjegjësi për humbjen.

Tre humbje dhe një fitore e Kosovës nën drejtimin e Foda-s

Për gjermanin Foda ishte ndeshja e parë zyrtare në Prishtinë në krye të Kosovës në ndeshjen ndaj Rumanisë. Dhe rezultati ishte dëshpërues.

Foda deri më tani e ka udhëhequr Kosovën në katër takime, ku ka marrë një fitore dhe tre humbje, ka shënuar një gol dhe ka pësuar tetë.

Kosova e përfundoi fushatën kualifikuese për Euro 2024 në vendin e parafundit në grupin I duke grumbulluar vetëm 11 pikë.

Ndërkaq në muajin shkurt të këtij viti, Foda ishte caktuar trajneri i ri i Përfaqësueses së Kosovës. Ai ishte prezantuar nga Federata e Futbollit të Kosovës.

Foda mori drejtimin e Kosovës pasi ishte papunë për gati dy vjet. Së fundmi drejtoi Cyrihun për një periudhë të shkurtër.

Kohën më të madhe si trajner, Foda e kaloi në Austri. Drejtoi për shumë vjet Sturm Grazin, me të cilët fitoi një herë titullin e kampionit dhe Kupën e Austrisë.

Për një vjet e udhëhoqi edhe Kaisterslauternin në Gjermani.

Nga viti 2018 deri më 2022, ishte trajneri i Përfaqësueses së Austrisë, të cilën arriti ta kualifikonte në Evropianin e vitit 2020 dhe kaloi fazën e grupeve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.