Pas aneksimit të Krimesë dhe vendosjes së sanksioneve perëndimore, Presidenti Vladimir Putin iu drejtua Huawei-t për të rindërtuar dhe përmirësuar infrastrukturën e komunikimit.
Tanimë, kompania kineze e teknologjisë është e pozicionuar për të ndihmuar regjimin e Putin-it në një shkallë shumë më të madhe.
Paçka kërcënimit të Washington-it për ta goditur atë me më shumë sanksione.
Në Krime, Rusia “shkatërroi pajisjet perëndimore të telekomunikacionit në territorin shumë të militarizuar dhe e zëvendësoi atë me Huawei dhe ZTE”, ka treguar eksperti Hosuk Lee-Makiyama.
Sipas tij, nëse Nokia dhe Ericsson largohen plotësisht nga Rusia, Moska “do të ketë nevojë për kompanitë kineze më shumë se kurrë, veçanërisht Huawei-n”.
Kompania, pavarësisht rënies fillestare në dërgesat e telefonave, ka qenë fituese e hershme nga lufta në Ukrainë.
Atje, shitjet e telefonave u rritën 300 për qind në dy javët e para të marsit.
Po ashtu edhe markat e tjera kineze si Oppo dhe Vivo regjistruan rritje treshifrore të shitjeve.
Katër qendrat e saj kërkimore ruse po rekrutojnë dhjetëra inxhinierë. Huawei ka shtuar gjithashtu hapje të reja shitjesh dhe zhvillimi biznesi në Moskë që nga fillimi i pushtimit të Ukrainës.
Por ekspertët kanë thënë se kompanitë kineze të teknologjisë si Huawei dhe rivali Xiaomi rrezikojnë të shkelin sanksionet nëse vazhdojnë të dërgojnë telefona dhe pajisje telekomunikacioni në Rusi.
Kjo pasi pajisjet elektronike shpesh përmbajnë gjysmëpërçues të nivelit të lartë ose janë bërë me mjete amerikane, duke i bërë ato subjekt i sanksioneve të reja ndaj Moskës.
Kështu që kompania mund të goditet me më shumë sanksione nga Washington-i, çka do t’i jepte një goditje tjetër të madhe operacioneve të kompanisë kineze.
Huawei ka punuar për të hequr veten nga zinxhiri i furnizimit të gjysmëpërçuesve amerikanë që kur sanksionet amerikane ia ndërprenë aksesin në çipa.
Sanksionet kanë qenë më të dëmshme për biznesin e telefonave inteligjentë të Huawei-t me çipa të rëndë, duke bërë që të ardhurat e produkteve të konsumatorit të tkurren me 50 për qind vitin e kaluar.
Vitin e kaluar, të ardhurat totale të Huawei-t ranë 29 për qind nga viti në vit në 100 miliardë dollarë, të nxitura nga shitjet afërsisht të sheshta në linjat e saj të telekomunikacionit dhe biznesit.
Marrë nga “Financial Times”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
