Kurti për torturat në burgjet serbe: Ishte si kamp përqendrimi, humba vetëdijen 40 herë – s’besova se do të dilja gjallë

Kryeministri i Kosovës, Albin Kurti, në një bisedë për podcastin “Rest is Politics” me Alastair Campbellin dhe Rory Steartin, ka treguar se gjatë kohës sa kishte qëndruar në burg në Serbi, kishte humbur gati 30 kilogramë, derisa ka thekesuar se për shkak të torturave nuk kishte besuar se do dilte i gjallë.

“Ishte si kamp përqendrimi. Humba gati 30 kilogramë në vitin 1999. Kishte tortura sistematike. Rrahje, që nganjëherë ndodhin edhe disa herë në ditë. Rrahje me shkopinj, shumë gardianë njëkohësisht. Këta ishin gardianë. U torturova nga uniforma. E humba vetëdijen afro 40 herë gjatë torturave, pra nuk kishte as gjasa të imagjinoja se do të dilja gjallë”, tha Kurti.

“Atje po na rrihnin të gjithë të burgosurve shqiptarë, nuk isha vetëm unë. Kishte mijëra shqiptarë. Për të mbijetuar nga torturat duhet të kesh edhe fat. Pashë njerëz që vdiqën pas 5 minutave të rrahjeve e torturave, e pashë njerëz, këtu përfshihem edhe unë, që u rrahëm shumë e dolëm gjallë. Nuk ishte në dorën tonë”.

Tutje kreu i Qeverisë së Kosovës ka shtuar se si ishte dënuar me 15 vjet burgim, por i mbajti 2 vjet e 7 muaj, fillimisht në Lipjan e më pas u transferua në Pozharec të Serbisë.

“Më 10 qershor 1999, kur Serbia po tërhiqte policinë e forcat ushtarake, në konvoj vendosën autobusë të kuq me të burgosur politikë shqiptarë në mes të tyre, që NATO-ja të mos bombardonte. Na përdorën si mburojë. U transferova në burg në Pozharec nga Lipjani, e Pozhareci ishte vendlindja e Millosheviçit. Kalova total 2 vjet e 7 muaj në burg. Një vit e 5 muaj gjatë Millosheviqit, 1 vjet e dy muaj në periudhën e Koshtunicës”, shtoi.

Gjatë kësaj interviste, kreu i Lëvizjes Vetëvendosje ka thënë se kohën sa kishte qëndruar prapa grilave në Serbi, e kishte shfrytëzuar për të lexuar libra.

“Në burg ka kohë për lexim. Është vend tamam për të lexuar, pa telefona mobilë, pa pije dhe mendoj se kam pasur dobi prej kësaj. Në të njëjtën kohë, të jesh një person i klasës së mesme, urban”.

Kurti, ka theksuar se posa ishte liruar nga burgu në dhjetor të vitit 2001, kishte vendosur ta themelonte Lëvizjen Vetëvendosje.

“Kur kam dalë nga burgu e krijova organizatën, saktësisht sepse dija se si të flas dhe si të lidhem me njerëz nga fshati”, potencoi Kurti.

Kurti: Kritika është e shëndetshme, por duhet ta mbroj e ta përfaqësoj Kosovën më mirë se aleatët

Ai ka thënë se nuk i pengojnë kritikat e Shteteve të Bashkuara të Amerikës dhe Bashkimit Evropian, pas ndalimit të përdorimit të dinarit në komunat e banuara më shumicë serbe.

Përkundrazi, ai ka theksuar se “kritika është e shëndetshme” dhe se beson se “nuk ka progres pa kritikë”, por ka potencuar se duhet “ta mbrojë Kosovën” dhe ta përfaqësojë më mirë se aleatët.

“Unë mendoj se duhet ta mbrojë Kosovën, duhet ta përfaqësojë atë më mirë se aleatët”, tha Kurti.

Tutje, kreu i qeverisë kosovare, ka theksuar se nuk do të ishte fare kryeministër, po të mos ishte Kosova Republikë.

“Mund të mos pajtohemi, por BE-ja, SHBA-ja dhe Mbretëria e Bashkuar janë aleatët tanë, miqtë tanë dhe partnerët tanë, por kjo nuk nënkupton se bashkëpunimi ynë është rrugë njëkahëshe”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.