Konjufca: Serbia po lihet e pandëshkuar për sulmin e Banjës – do ta përsërisë këtë skenar

Kryetari i Kuvendit, Glauk Konjufca, pas takimit me presidentin e Këshillit Kombëtar të Zvicrës, Eric Nussbaumer, ka thënë se këtë të fundit e ka njoftuar se ekziston rreziku që Serbia ta përsërisë një sulm të ngjashëm si ai Banjës i vitit të kaluar ku kishte mbetur i vrarë rreshteri policor Afrim Bunjaku.

“Ia shpreha shqetësimet se nëse Serbia lihet e pandëshkuar lidhur me agresionin e 24 shtatorit në Banjës, Serbia ka për ta përsëritur këtë skenar. Serbia është një shtet që nuk e ka sanksionuar Rusinë, por që vazhdon të ketë bashkëpunim me të”, tha Konjufca para gazetarëve.

Tutje, ai ka potencuar se Serbia po e shkel marrëveshjen e Brukselit/Ohrit dhe parimet e kësaj dakordance mes Kosovës dhe Serbisë për fqinjësi të mirë.

“Nuk mund të thotë Serbia me Kosovën do të sillet agresore dhe me një moment të caktuar do të fillojë të bëhet fqinje e mirë, fqinjë i mirë Serbia ka zgjedhur të jetë në letër në momentin kur e ka pranuar marrëveshjen. Ajo marrëveshje e ka edhe principin e zgjidhjes së problemeve në mënyrë paqësore, por ne e përjetuam Banjën”, shtoi.

“Problemi është që Serbia po i shkel parimet e marrëveshjes, mund t’i përmendi dy nga këto. Pavarësia sovrane mes shteteve duke mos e pranuar fare Kosovën si shtet, as de facto. Edhe e dyta atë principin e mos pengimit të Kosovës për t’u anëtarësuar në institucionet evropiane. Serbia po e pengon Kosovën në çdo hap dhe do ma ia shkatërru subjektivitetin ndërkombëtar”.

Teksa ka folur për pozicionin e Qeverisë së Kosovës në dialog dhe për draft-statutin e Asociacionit të Komunave me Shumicë Serbe, kreu i Kuvendit ka theksuar se ky mekanizëm mund të ketë afat, meqë Seria po i shkel parimet e marrëveshjes.

“Asociacioni mund të ketë afat, nuk është parim. Nëse sulmohemi nga Serbia janë shkel parimet e marrëveshjes, ne nuk kemi fqinjësi të mirë, ne kemi armiqësi, jo për shkak të tonin, por për fajin e Serbisë. Fakti që Serbia po i shkel këto parime, kjo na jep të drejt që të mos hedhim hapin tjetër, keni dëgjuar për Asociacionin, po është pika e shtatë”, ka përfunduar Konjufca.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.