Kurti fajëson opozitën për votimin e Ligjit për Amnistinë: U bë falja e krimeve serbe në Kosovë
![](https://albanianpost.com/wp-content/uploads/2024/07/opozita.jpg)
Kryeministëri i Kosovës, njeherit kryetari i Lëvizjes Vetëvendosje Albin Kurti, në mbledhjen e Këshillit të Përgjithshëm të kësaj partie, ka fajësuar partitë opozitare për votimin e Ligjit për Amnistinë në Kuvendin e Kosovës gjatë vitit 2013, përmes të cilit sipas tij, “u bë falja e krimeve serbe në Kosovë”.
“Më 11 korrik janë bërë 11 vjet prej kur prej procedurave të shpejtuara deputetët nga të gjitha partitë të cilët janë në opozitë sot, me 2/3 e votave miratuan Projektligjin për Amnisti që i fali krimet e Serbisë në Kosovë. Qeveritarët e asaj kohe e përshkruan ligjin si një akt të rëndësishëm politik, por qytetarët dhe organizatat protestuan kundër duke qëndruar ditë e natë para Kuvendit të Kosovës”, tha Kurti para bashkëpartiakëve.
Për Kurtin, “ironia bëhej edhe më fort”, sepse ligji në fjalë u votua pikërisht në ditën kur po shënohej përvjetori i gjenocidit të Serbisë në Srebrenicë, derisa ka theksuar se “në Kosovë miratohej amnistia e kriminelëve dhe të strukturave që kontrollohen nga Beogradi”.
“Qeveria jonë i ka shpallur organizatat e tyre “Mbrojtja Civile” dhe “Brigada e Veriut” organizata terroriste. Nuk ka amnisti, sepse ajo do të ishte padrejtësi ndaj viktimave dhe qytetareve. Ne konfirmojmë angazhimin tonë për drejtësi e cila është parakusht për paqe të qëndrueshme dhe për pajtim midis popujve”, potencoi lideri i LVV-së.
“I bëjmë thirrje organeve tona të drejtësisë që të jenë shumë më aktive në mënyrë që plagët e hapura nga krimet ndaj popullit tonë të mbyllen me drejtësi për viktimat dhe me ndëshkim ndaj kriminelëve”.
“Ka sundim të ligjit dhe shtrirje të sovranitetit”, Kurti fton mërgimtarët për të investuar në Kosovë
Kurti i ka ftuar mërgatën për t’u kthyer në atdhe dhe për investuar, meqë ka theksuar se me qeverisjen e tij ka sundim të ligjit e shtrije të sovranitetit.
“Tash kemi rritje ekonomike dhe stabilitet institucional, progres shoqëror me qeverisje të mirë, sundim të ligjit e shtrirje të sovranitetit, lëvizje të lirë e pa viza për shumë vende. Këto janë arsye jo vetëm për të qëndruar në Kosovë, por edhe për t’u kthyer në atdhe”, tha Kurti.
“Ejani përsëri për pushime verore në Kosovë, ejani edhe për pushime jashtë stinë së verës. Ejani edhe për punë dhe ktheheni në vendlindjen tuaj. Juve që jeni ndërmarrës ju themi investoni që të fitoni. Kosova po zhvillohet dhe po përparon dhe bashkatdhetarët janë pjesë e këtij suksesi”.
Tutje gjatë fjalimit të tij, Kurti ka folur edhe për regjistrimin e mërgatës dhe u ka bërë thirrje atyre që të vazhdojnë të regjistrohen.
“Regjistrimi online i mërgatës po vazhdon. Ai është i hapur deri në fund të muajit gusht e edhe nga këtu sot u bëj thirrje të gjithë bashkatdhetarëve tonë të dashur që patjetër të regjistrohen ata të cilët tashmë nuk e kanë bërë këtë gjë dhe jo vetëm kaq”, potencoi kreu i Qeverisë.
Ndërkaq kur ka folur për fillimin e inkasimit të faturave të rrymës në katër komunat veriore, ai ka potencuar se “vrima prej të cilës rridhte pa ndërprerë paraja e buxhetit tonë, po mbyllet njëherë e përgjithmonë”
“Në këtë gjashtëmujor për herë të parë filloi edhe regjistrimi i energjisë elektrike në katër komunat në veri dhe inkasimi për konsum të energjisë. Më në fund e pas një kohe shumë të gjatë që matet me dekada dhe jo vite e muaj, vrima prej të cilës rridhte pa ndërprerë e pa masë paraja e buxhetit tonë po mbyllet njëherë e përgjithmonë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com