Hoxhaj: Për propozimin evropian Kosova duhet ta ketë vëmendjen tek plani i zbatimit

Deputeti i Partisë Demokratike të Kosovës, Enver Hoxhaj, ka deklaruar se kryeministri i Kosovës, Albin Kurti, duhet ta ketë vëmendjen tek plani i zbatimit të propozimit franko-gjermane.

Pas mbledhjes së kryesisë Hoxhaj, pati kërkesë ndaj kryeministrit që ta mbrojë Kushtetutën dhe rendin kushtetues të Kosovës.

“Kosova në këtë fazë pas asaj që Kurti i ka thënë po në Bruksel, duhet ta ketë vëmendjen kryesore te plani për zbatim. E them këtë si një njeri që kam qenë në negociatat në Vjenë, kur kemi negociuar për Pakon e Ahtisarit që çfarë shkruan në letër, ato parimet e përgjithshme për planin evropian”.

“Qeveria do të duhej ta ketë vëmendjen është që të shoh sesi këto nene të kësaj marrëveshje ta kenë një plan të zbatimit i cili mbron interesat e Republikës së Kosovës. Tema kryesore tash është cili do të jetë plani i zbatimit të kësaj marrëveshjeje”, ka thënë Hoxhaj.

Tutje ka thënë që kryeministri t’i shfrytëzoj njohuritë dhe përvojen që e ka pasur në lidhje me dialogun gjatë kohës sa ka qenë në opozitë.

“Kërkojmë prej Kurtit i cili është marrë gjatë me temën e dialogut sa ka qenë në opozitë, i cili ka mbledhur përvojë gjatë sa ka qenë në opozitë tash ta ketë një dije funksionale dhe të negociojë në mënyrë shumë politike, shumë profesionale para se këto të zbërthehen në planin e zbatimit”.

“Ne insistojmë që mbi te gjitha të mbrohet Kushtetuta dhe rendi kushtetues i Kosovës”.

Ndryshe, gjatë së enjtes së 2 marsit kryeministri i Kosovës, Albin Kurti, ka raportuar në Kuvendin e Kosovës për marrëveshjen e fundit të arritur mes Kosovës dhe Serbisë, të njohur si propozimi evropian.

Propozimi franko-gjerman që Kosovës dhe Serbisë iu dorëzua shtatorin e vitit 2022, u pranua gjatë takimit të 27 shkurtit mes kryeministrit të Kosovës, Albin Kurti, dhe presidentit të Serbisë, Aleksandar Vuçiç në praninë e ndërmjetësuesve evropianë.

Ky propozim titullohet: “Marrëveshja drejt normalizimit mes Kosovës dhe Serbisë”.

Për herë të parë është zbuluar edhe zyrtarisht dokumenti i Bashkimit Evropian për normalizimin e marrëdhënieve ndërmjet Kosovës dhe Serbisë.

Ky propozim parasheh të drejta të barabarta për Kosovën dhe Serbinë, respektim të integritetit territorial, paprekshmëri të kufijve, njohje të simboleve shtetërore dhe garanci shtesë për komunitetin serb në Kosovë. Aty nuk përmendet njohja reciproke.

Lexojeni tekstin e plotë të dokumentit franko-gjerman që tani është pagëzuar zyrtarisht me emrin “Marrëveshja për rrugën drejt normalizimit ndërmjet Kosovës dhe Serbisë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.