![](https://albanianpost.com/wp-content/uploads/2022/02/enver-hoxhaj.jpg)
Ish-ministri i Punëve të Jashtme të Kosovës, Enver Hoxhaj, ka reaguar pas raportimeve për planifikimin e vrasjes së ish-presidentit të Malit të Zi, Millo Gjukanoviç, duke thënë se paramilitarët dhe kriminelët serbë që operojnë në pjesën veriore të Kosovës mund të jenë të përfshirë në këtë ngjarje.
“Paramilitarët dhe kriminelët serbë nga veriu i Kosovës luajtën një rol vendimtar në tentativën për grusht shtet në vitin 2016 kundër presidentit Gjukanoviç dhe tani janë të përfshirë në planet për vrasjen e tij. Këto ngjarje janë të ndërlidhura, duke përfshirë Beogradin dhe Moskën, që synojnë hegjemoninë”, ka shkruar Hoxhaj në platformën “X” të dielën.
Duke komentuar rreth informacioneve jozyrtare të mediave malazeze, një zyrtar i DPS-së konfirmoi se Gjukanoviçi për këtë është paralajmëruar nga qarqet e agjencive të huaja të inteligjencës, por nuk ka dashur të japë detaje. Megjithatë, mediat malazeze raportuan se organet malazeze u njoftuan për planifikimin e atentatit ndaj Gjukanoviçit nga një ish-zyrtar i lartë i Kosovës.
Ndryshe, disa media malazeze, duke u thirrur në burime nga sektori i sigurisë, raportuan gjatë vikendit se një grup kriminal planifikoi një atentat ndaj Gjukanoviçit, themelues i Partisë Demokratike të Socialistëve (DPS) – subjekt që udhëhoqi Malin të Zi drejt pavarësisë dhe anëtarësimit në NATO.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com