Hovenier: SHBA-të krenarë për gjithçka që ka arritur Kosova

Ambasadori i Shteteve të Bashkuara të Amerikës në Kosovë, Jeffrey Hovenier, ndërsa ka kujtuar 25 vjetorin e Ditës së Çlirimit ka potencuar se SHBA-të janë krenarë për gjithçka që ka arritur Kosova.

Kosova, sipas Hovenier, ka ndërtuar shtet sovran, demokratik dhe shumetnik.

“Ajo që keni arritur është e jashtëzakonshme. SHBA-të janë krenare që janë partneri juaj ndërsa shënoni këtë moment historik të rëndësishëm”, tha ai.

Ai ka theksuar përkushtimin e SHBA-ve ndaj popullit të Kosovës, përkushtim ky i cili, sipas tij, është “po aq i fortë dhe i qëndrueshëm si gjithmonë”.

“Ne qëndrojmë me popullin e Kosovës kundër autoritarizmit, kundër çdo përpjekjeje për të shtypur brutalisht dhe për të ndarë shoqërinë në vija etnike ose fetare, kundër shkatërrimit me dhunë të jetës dhe jetesës së njerëzve dhe kundër vullnetit të tyre”.

“Dhe ne qëndrojmë me krenari dhe plotësisht përkrah popullit të Kosovës. Kemi qenë me ju që nga fillimi. Jemi me ju tash. Dhe mirëpresim të qëndrojmë përkrah jush në vitet në vijim. Urime”, shtoi ai.

Hovenier ndërsa ka kujtuar hyrjen e forcave të NATO-s në Kosovë, potencoi se “lidershipi i SHBA-së luajti rol jetik për të mundësuar këtë”.

“Ne, së bashku me aleatët tanë i dhamë fund njëherë e përgjithmonë fushatës së tmerrshme të spastrimit etnik që regjimi i Millosheviçit e kreu këtu në Kosovë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.