Hovenier: Disa zgjidhja që bëri Qeveria Kurti pamundësuan realizimin e dëshirave për Kosovën – jemi të shqetësuar
![](https://albanianpost.com/wp-content/uploads/2024/07/56666666.png)
Ambasadori amerikan në Kosovë, Jeffrey Hovenier, ka deklaruar se Shtetet e Bashkuara të Amerikës (SHBA), së bashku me disa partnerë të tjerë siç janë Mbretëria e Bashkuara, Franca, Italia, Gjermani, Bashkimi Evropian janë të shqetësuar për disa çështje politike që janë bërë nga Qeveria Kurti.
Ai kur u pyet nga gazetarët gjatë vizitës së tij në Gjakovë, për raportet që ka SHBA-ja me kryeministrin e Kosovës, Albin Kurti, tha se ka shumë çështje që s’është dashur të krijohen pasi që pengojnë synimet e tyre pë Kosovën.
“S’ka asgjë të re në raport me Kosovën. Përkushtimi i SHBA-ve ndaj Kosovës, është i fuqishëm dhe i hekurt si gjithmonë dhe prandaj jam këtu sot”.
“Kjo nuk nënkupton që SHBA-ja do të pajtohet me çdo zgjidhje që do të bëjë Qeveria e Kosovës dhe nuk është fare e fshehur që Qeveria ime së bashku me disa prej atyre partnerëve që punojmë kemi disa shqetësime për disa çështje politike të cilat i ka bërë Qeveria Kurti dhe të cilat e pamundësojnë arritjen e asaj që dëshirojmë për Kosovën”, ka thënë Hovenier gjatë vizitës së tij në Gjakovë.
Ndër të tjera, është pyetur edhe për kalimin e ligjit të Këshillit Prokurorial të Kosovës dhe Këshillit të Pavarur për Media nga Qeveria e Kosovës.
Sipas tij s’është e rrugës së duhur që kur disa vendime kritikohen nga organizatat ndërkombëtare ai të miratohet.
“Kam pasur rastin që të bisedoj me zyrtarët e Qeverisë, lidhur me këtë çështje. Këshilla e Shteteve të Bashkuara të Amerikës drejtuar institucioneve të Kosovës është që çfarëdo legjislacioni që kalon dhe miratohet të jetë në përputhje me normat evropiane sepse kjo do ta lehtësoj procesin që Kosova t’i përafrohet Bashkimit Evropian”.
“Ne e shohim që Kosova mund të jetë pjesë e Bashkimit Evropian dhe organizatave të tjera, prandaj nuk na duket shumë e mençur që Kosova të ketë legjislacion që pikërisht është kritikuar nga ato organizata të Bashkimit Evropian e që s’janë në përputhje me normat evropiane”, deklaroi ai.
Partitë opozitare në Kosovë, kanë paralajmëruar se projektligjin për KPM-në dhe KPK-në do ta dërgojnë në Gjykatën Kushtetuese.
Më 11 korrik, Kuvendi i Kosovës ka miratuar projektligjin për ndryshimin dhe plotësimin e ligjit për Këshillin Prokurorial të Kosovës dhe atë për Këshillin e Pavarur të Mediave.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com