![](https://albanianpost.com/wp-content/uploads/2021/11/avdullah-hoti-qeveria-1.jpg)
Ish kryeministri i Kosovës dhe deputeti i Lidhjes Demokratike të Kosovës, Avdullah Hoti, ka vlerësuar se përgatitja dhe dërgimi i draft-statutit të Asociacionit të Komunave me Shumicë Serbe do të duhej të dërgohej në Gjykatën Kushtetuese kur kërkesa ishte bërë nga Shtetet e Bashkuara të Amerikës.
Hoti, përmes një shkrimi në rrjetin social ‘Facebook’ ka thënë se pushteti tashmë është fundosur në ujëra të thella, që e ka të vështirë të dal edhe me ndihmën e partnerëve.
“Kur zhytesh në batak, siç është zhytur Qeveria e Kosovës në procesin e dialogut, kërkon ndihmë për të dalë nga aty dhe një ndihmë e tillë nuk ka munguar nga aleatët dhe opozita. Nëse lëviz duke qenë i zhytur në batak, atëherë fundosesh më thellë. Mandej vështirë del edhe me ndihmën e miqve dhe nuk del pa pasoja”.
Zëvendësministri për Punë të Jashtme, Kreshnik Ahmeti, kishte konfirmuar se Kosova ka mbetur jashtë agjendës së takimit të radhës së Këshillit të Ministrave të Këshillit të Evropës, ku do të shqyrtohej anëtarësimi apo jo i Kosovës në këtë organizatë ndërkombëtare.
Ndërkaq Gjermania dhe Franca kanë kërkuar që Kosova të bëjë një hap substancial në raport me Asociacionin – të paktën dërgimin e draft-statutit të këtij mekanizmi në Kushtetuese për shqyrtim – kur në pyetje është anëtarësimi i Kosovës në Këshillin e Evropës.
Ndërsa kryeministri i Kosovës, Albin Kurti, të mërkurën në mbledhjen e radhës së Qeverisë së Kosovës e kishte quajtur “absurde” kërkesën e Gjermanisë dhe Francës që draft-statuti i Asocaicionit të dërgohet në Gjykatën Kushtetuese para anëtarësimit në KiE.
Por, më 15 maj, Qeveria e Kosovës iu drejtua me një letër Këshillit të Evropës, duke e njoftuar se Kosova po përgatit një draft-statut për themelimin një mekanizmi për vetëmenaxhim, koordinim dhe bashkëpunim të Komunave me Shumicë Serbe në Kosovë.
Ky draft, do të dërgohet për interpretim në Gjykatën Kushtetuese deri në fund të muajit maj.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com